Nega sud qarori o‘zgarib qoldi? Sudya bunga izoh berishdan bosh tortdi

Bosh shifokor va “Daryo” jurnalisti o‘rtasida bo‘lib o‘tgan holatni ko‘rib chiqqan Toshkent shahar ma’muriy sudi sudyasining qarori sud zalida boshqacha, qog‘ozga ko‘chirilganida esa boshqacha aks etgani ma’lum bo‘ldi.

Eslatib o‘tamiz, 2020-yilning mart oyida Respublika teri-tanosil kasalliklari shifoxonasi bosh shifokori Oybek Ibrohimov “Daryo” muxbiri Musulmonbek Ibrohimovni haqoratlab, ma’lumot olishda to‘sqinlik qilgani bois muxbir IIBga ariza bilan murojaat qilgan edi. Lekin jurnalistning idorama-idora sargardonligiga qaramay, Mirobod tumani ma’muriy sudi ko‘rib chiqish vaqti o‘tgan deb, ishni yopib yuborgandi.

Shundan so‘ng “Daryo” muxbiri Toshkent shahar prokuraturasiga ushbu ishni qonuniy o‘rganib chiqishni so‘rab ariza bilan murojaat qildi. Toshkent shahar Mirobod tumani prokuraturasi arizani o‘rganib chiqib, kassatsiya protestida Mirobod tumani ma’muriy sudining 2020-yil 24-iyun kunidagi bosh shifokor Oybek Ibrohimovga nisbatan chiqarilgan qarorini noqonuniy va asossiz deb topib, ushbu qarorni bekor qilishni va ishni qo‘shimcha surishtiruvga yuborishni so‘rab protest kiritgan.

Sud zalida boshqa, qog‘ozda boshqa qaror

Toshkent shahar ma’muriy sudi sudyasi G‘olibjon Davlatov raisligida bo‘lib o‘tgan 2020-yil 10-dekabr kunidagi kassatsiya instansiyasi sudida Mirobod tumani ma’muriy sudi chiqargan qarori qayta ko‘rib chiqildi. Sud avvalgi qarorni adolatsiz va asossiz deb topib, Mirobod tumani ma’muriy sudining 2020-yil 24-iyundagi Oybek Ibrohimovga nisbatan chiqargan qarorini bekor qildi.

Sud zalida qaror o‘qilayotgan vaqtda sudya G‘olibjon Davlatov “Huquqbuzar Ibragimov Oybek Jo‘rayevichga nisbatan Ma’muriy javobgarlik to‘g‘risidagi kodeksning 41-moddasi va 183-moddasida nazarda tutilgan huquqbuzarlik holatlariga huquqiy baho berish uchun qo‘shimcha surishtiruv harakatlarini o‘tkazish uchun Toshkent shahar Mirobod tumani Ichki ishlar organlari faoliyatini muvofiqlashtirish boshqarmasiga ish materiallari yuborilsin”, deb aytgan edi.

Lekin sud qarorining qog‘oz variantida esa “Ma’muriy javobgarlik to‘g‘risidagi 41-moddasida nazarda tutilgan huquqbuzarlikni sodir etganlikda ayblangan Oybek Ibrohimovga nisbatan to‘plangan ma’muriy ish hujjati qo‘shimcha surishtiruv harakatlarini olib borishlik uchun tuman ma’muriy sudi orqali Toshkent shahar Mirobod tumani IIO FMB surishtiruv bo‘limiga yuborilsin”, deb yozilgan. Ya’ni Ma’muriy javobgarlik to‘g‘risidagi kodeksning 183-moddasida nazarda tutilgan huquqbuzarlik holatiga baho berish qismi tushirib qoldirilgan (sudning audioyozuvi tahririyatda mavjud).

Sud qaroriga nima sababdan o‘zgartirish kiritilganiga izoh olish uchun sudya G‘olibjon Davlatov bilan “Daryo” muxbiri bog‘landi. Sudya hozir boshqa ishga o‘tgani bois ushbu qarorga izoh berolmasligini, agar qarordan norozilik bo‘lsa, yuqori turuvchi organga shikoyat qilish mumkinligini qo‘shimcha qilib o‘tdi.

Ishni ko‘rib chiqishni asossiz rad etgan sudyaga jazo qo‘llaniladimi?

Toshkent shahar ma’muriy sudi Mirobod tumani sudi chiqargan qarorini asossiz deb topib, bekor qildi.

Kassatsiya instansiyasining qarorida Mirobod tumani ma’muriy sudi mazkur ishni 15 kunlik muddatda ko‘rib chiqish muddatini buzib, ishni oradan 40 kun keyin ko‘rilishiga yo‘l qo‘ygan, rasmiylashtirilgan ma’muriy huquqbuzarlik to‘g‘risidagi ma’muriy ishni noto‘g‘ri tuzilgan deb, bayonnomani tuzgan organga asossiz qaytargani aniqlangani bayon etilgan.

Haqli savol tug‘iladi: birinchi instansiyada Mirobod tumani ma’muriy sudi sudyasi Tolipov nima uchun bayonnomani asossiz qaytargan? Toshkent shahar ma’muriy sudi sudyasi va Mirobod tumani ma’muriy sudi sudyasining xatti-harakatlariga Oliy sud, Sudyalar oliy kengashi va Bosh prokuratura qonunda belgilangan tartibda baho berishi maqsadga muvofiqdir.