Тошкент–Олот–Тошкент йўналишида йўловчи поездлари қатнови йўлга қўйилди
Ўзбекистон Президенти 2021 йил 21–22 январь кунлари Бухоро вилоятига қилган ташрифи давомида Олотга йўловчи поездлар қатновини йўлга қўйиш бўйича таклиф берган эди. «Ўзбекистон темир йўллари» томонидан 2021 йил 25 январдан бошлаб Тошкент—Олот—Тошкент йўналишида ҳафтасига 4 маротаба йўловчи поездлари қатнови йўлга қўйилди. Бу ҳақда компания ахборот хизмати хабар қилди.
Унга кўра ҳафтанинг душанба, сешанба, пайшанба ҳамда жума кунлари Тошкент—Олот йўналишида, 26 январдан бошлаб эса ҳафтанинг сешанба, чоршанба, жума ва шанба кунлари Олот—Тошкент йўналишида йўловчи поездлар қатнови бошланади.
Қўшимча маълумотларни Тошкент шаҳрида 1005 қисқа телефон рақами, жойлардаги темир йўл кассалари ҳамда маълумотлар бюросидан билиб олиш мумкин.
Аввалроқ Ўзбекистонда 2021 йилда авиа ва темир йўл чипталарига 30 фоиз чегирма берилиши, «Ўзбекистон темир йўллари» 63,4 млрд сўм зарар кўргани ҳамда «Афросиёб» поездининг рейслари сони биттага кўпайгани ҳақида хабар берилганди.
