Коронавирус пандемияси сўнгги 100 йилликдаги энг кучли иқтисодий инқирозга олиб келди. Бу ҳақда Бирлашган Миллатлар Ташкилоти (БМТ) бош котиби Антониу Гутерриш айтиб ўтди, деб ёзади «РБК».
Унинг сўзларига кўра, дунёнинг бугунги ҳолатини «мўртлик» деган сўз билан тавсифлаш мумкин.
«Икки миллиондан ортиқ одам вафот этди ва биз қарийб 100 йил ичидаги энг ёмон иқтисодий инқирозга тушиб қолдик. Биз буни одамлар ва мамлакатлар ўртасидаги тенгсизликда кўриб турибмиз, буни пандемия бор бўйи билан намоён қилди. Аёллар, хусусан, иш йўқотиш ва парвариш қилиш бўйича қўшимча ташвишлардан қаттиқ жабр кўрди. Биз, шунингдек, иқлим ва биохилма-хиллик инқирозларидаги беқарорликни ҳам кўряпмиз», — деди Гутерриш.
Унинг таъкидлашича, 2021 йилда дунё етакчилари йўналишни ўзгартириш ва тўғри йўналишда ҳаракатланиш орқали дунёни тўғри йўлга йўналтириши керак. «Биз COVID-19 пандемиясидан кейинги қайта тикланишимиздан фойдаланиб, заифликдан барқарорликка ўтишимиз керак», — деди Гутерриш.
Шу билан бирга, у мавжуд хавфлар ва тўсиқларни бартараф қилиш учун музокаралар ва ҳамкорлик талаб қилинишини эслатди. «Ҳукуматлар, халқаро ташкилотлар, хусусий сектор ва фуқаролик жамияти, шаҳарлар бирга ишлаши керак», — деди БМТ бош котиби.
У, шунингдек, коронавирусга қарши вакцинанинг бир текисда тақсимланмаслиги масаласини яна кўтарди. Вакциналар асосан ривожланган мамлакатларга келиб тушаётгани, пастроқ даромадли давлатлар эса вакцинасиз қолаётганини айтди. Бош котиб вакцинага глобал жамият фаровонлиги деб қараб, энг ночор мамлакатларни вакцина билан таъминлашга йўналтирилган COVAX ташаббусини молиялаштиришга чақирди.
Изоҳ (0)