BMT bosh kotibi Antoniu Guterrish tashkilotning birinchi majlisi o‘tkazilgan kunga bag‘ishlangan tadbirda kirib kelgan yilni 1945-yilga qiyosladi, deb xabar bermoqda “RBK”.

Foto: Getty Images

“Biz 1945-yildagidek bir fursatni boshdan kechirmoqdamiz. Ammo bu 1945-yil emas”, — dedi Guterrish ayni paytda koronavirus va boshqa sinovlarga qarshi urush olib borilayotganini ta’kidlab: “Ertaga kibermakonda terrorchilarga qarshi kurash ham boshlanishi mumkin. Va biz iqlim o‘zgarishiga qarshi uzoq davom etayotgan urushda hamon mag‘lub bo‘lyapmiz”.

BMT bosh kotibi xalqaro hamkorlikka bo‘lgan zaruriyat saqlanib turganini ham qayd etdi. Uning so‘zlariga ko‘ra, koronavirus pandemiyasi bu sohada jiddiy muammolarni ko‘rsatib qo‘ygan: dunyo “vaksina natsionalizmi” degan voqelikka duch kelgan, bu boy mamlakatlarning o‘z fuqarolari uchun dorilar sotib olish borasida raqobatlashishidan iborat. U Jahon sog‘liqni saqlash tashkilotining (JSST) nochor mamlakatlarning 2 million doza arzon vaksina olishini ta’minlaydigan COVAX loyihasini qo‘llab-quvvatlagan Buyuk Britaniya hukumatiga minnatdorlik bildirdi.

Guterrish dunyoda “vaksina natsionalizmi” paydo bo‘lgani haqida avval ham gapirgan. Chunonchi, dekabrda nochor mamlakatlarda yashovchi odamlar rivojlangan mamlakatlarda koronavirusga qarshi vaksinaga tayyorgarlik borayotganini kuzatib, ularning o‘zlari qachondir emlanishi haqida savollar berayotganini aytgandi. JSST rahbari Tedros Gebreyesus o‘z navbatida vaksinalarga sayyoraning har bir fuqarosining qo‘li yetadigan “global jamoatchilik manfaati” deb qarashga chaqirdi.

Avvalroq BMT bosh kotibi Antonio Guterrish 2021-yilni koronavirus pandemiyasi oqibatidan xalos bo‘lishga bag‘ishlashga chaqirgan edi.

“Kelinglar, o‘zaro va tabiat bilan murosaga kelib, iqlim inqirozini yengamiz. COVID-19 tarqalishini to‘xtatib, 2021-yilni tiklanish yili qilamiz”, — degan Guterrish.

U gap pandemiya oqibatlarini tugatish, “qulagan iqtisodiyot va jamiyatni” rivojlantirish, bo‘linishlarni bartaraf etish va “sayyoramizni tiklash uchun harakatni boshlash” haqida ketayotganini qayd etgan.