“Andijonnoma” tahririyati o‘rnida Prezident maktabi quriladi. Tahririyat xodimlari ko‘chada qolishdan xavotirda

Prezident Shavkat Mirziyoyev 20-dekabrda parlamentga yo‘llagan murojaatnomasida 2021-yilda 10 ta Prezident maktabi bunyod etilishini ta’kidlagan edi.

“Xabar.uz”ning yozishicha, Andijonda Prezident maktabiga joy qidirilib, shahar hokimligi va “Andijonnoma” tahririyati binosiga to‘xtalgan. Hozirgi paytda tahririyat binosida viloyat axborot va ommaviy kommunikatsiyalar boshqarmasi, O‘zbekiston Jurnalistlari ijodiy uyushmasi viloyat bo‘limi, “Xalq so‘zi” gazetasi hamda O‘zbekiston milliy axborot agentligi hududiy muxbirlari ham ishlamoqda.

Qayd etilishicha, tahririyat binosi 1972—1975-yillarda respublikaning o‘sha paytdagi rahbari Sharof Rashidov tashabbusi bilan qurilgan. Bu tahririyatning 50 yillik yubileyiga to‘yona bo‘lgan. 2021-yilda “Andijonnoma” 100 yilligini nishonlaydi.

21-yanvar kuni Andijon viloyati hokimi Shuhrat Abdurahmonov kelib, bino joylashuvini ko‘rgach jurnalistlarda “Tahririyat xodimlari ko‘chada qolmasmikan?” degan xavotir paydo bo‘lgan. Shu sababli jurnalistlar bu masalada Prezident virtual qabulxonasiga murojaat qilgan.

Andijon viloyati hokimligi matbuot xizmati ham Prezident maktabi Alisher Navoiy shoh ko‘chasida joylashgan Andijon shahar hokimligi va tahririyat binolarining o‘rnida bunyod etilishi rejalashtirilganini tasdiqladi.

Biroq tahririyat xodimlari hamda viloyat jurnalistlarining xavotiriga o‘rin yo‘qligini, tahririyat uchun Andijon shahri markazida barcha qulaylik va sharoitlarga ega, zamonaviy bino qurib bitkazilib, tahririyat ko‘chirib o‘tkazilgandan so‘ng qurilish ishlari amalga oshirilishini ma’lum qildi.

Hozirda Prezident maktablari Qoraqalpog‘iston Respublikasi, Namangan va Xorazm viloyatlari hamda Toshkent shahrida faoliyat yuritmoqda. 2021-yilda Navoiy, Surxondaryo, Sirdaryo Toshkent va Andijon viloyatlarida Prezident maktablari qurilishi rejalashtirilgan.