Президент Шавкат Мирзиёев 20 декабрда парламентга йўллаган мурожаатномасида 2021 йилда 10 та Президент мактаби бунёд этилишини таъкидлаган эди.
«Xabar.uz»нинг ёзишича, Андижонда Президент мактабига жой қидирилиб, шаҳар ҳокимлиги ва «Андижоннома» таҳририяти биносига тўхталган. Ҳозирги пайтда таҳририят биносида вилоят ахборот ва оммавий коммуникациялар бошқармаси, Ўзбекистон Журналистлари ижодий уюшмаси вилоят бўлими, «Халқ сўзи» газетаси ҳамда Ўзбекистон миллий ахборот агентлиги ҳудудий мухбирлари ҳам ишламоқда.
Қайд этилишича, таҳририят биноси 1972—1975 йилларда республиканинг ўша пайтдаги раҳбари Шароф Рашидов ташаббуси билан қурилган. Бу таҳририятнинг 50 йиллик юбилейига тўёна бўлган. 2021 йилда «Андижоннома» 100 йиллигини нишонлайди.
21 январь куни Андижон вилояти ҳокими Шуҳрат Абдураҳмонов келиб, бино жойлашувини кўргач журналистларда «Таҳририят ходимлари кўчада қолмасмикан?» деган хавотир пайдо бўлган. Шу сабабли журналистлар бу масалада Президент виртуал қабулхонасига мурожаат қилган.
Андижон вилояти ҳокимлиги матбуот хизмати ҳам Президент мактаби Алишер Навоий шоҳ кўчасида жойлашган Андижон шаҳар ҳокимлиги ва таҳририят биноларининг ўрнида бунёд этилиши режалаштирилганини тасдиқлади.
Бироқ таҳририят ходимлари ҳамда вилоят журналистларининг хавотирига ўрин йўқлигини, таҳририят учун Андижон шаҳри марказида барча қулайлик ва шароитларга эга, замонавий бино қуриб битказилиб, таҳририят кўчириб ўтказилгандан сўнг қурилиш ишлари амалга оширилишини маълум қилди.
Ҳозирда Президент мактаблари Қорақалпоғистон Республикаси, Наманган ва Хоразм вилоятлари ҳамда Тошкент шаҳрида фаолият юритмоқда. 2021 йилда Навоий, Сурхондарё, Сирдарё Тошкент ва Андижон вилоятларида Президент мактаблари қурилиши режалаштирилган.
Изоҳ (0)