Qo‘shma Shtatlarga tashrif buyuruvchi chet elliklardan koronavirusga topshiradigan test natijasi manfiy bo‘lishi bilan birga karantin ham talab qilinadi. Bu haqda AQSh prezidenti Jo Bayden aytib o‘tgan, deb yozmoqda “RBK”.
COVID-19 tarqalishiga qarshi kurash bo‘yicha yangi ma’muriyatning qarorlari Oq uy veb-saytiga joylashtirilgan 200 betlik strategiyada bayon qilingan. Hujjatda ma’muriyat ichki va xalqaro sayohatlarda xavfsizlik choralari to‘g‘risida maxsus farmon qabul qilishi aytib o‘tilgan. Ushbu qoidalarga ko‘ra, sayohatchilar AQShga kelgach, koronavirusga manfiy test javobini ko‘rsatishi hamda AQSh Kasalliklarni nazorat qilish va oldini olish markazlari tavsiyalariga muvofiq karantindan o‘tishi kerak.
Bundan tashqari, Oq uy barcha shtatlar hukumatlariga jamoat transportida niqob taqish rejimini joriy etishni ma’lum qilgan.
“COVID-19’ni mag‘lub etish mumkin va biz buni uddalaymiz. Amerika COVID-19 pandemiyasiga siyosat bilan emas, ilm-fan, asosli ma’lumotlar va sog‘liqni saqlash choralari bilan javob qaytaradi ”, — deyiladi Oq uy bayonotida.
Ma’lumotlarga ko‘ra, Bayden inauguratsiyasi arafasida 46-prezident tomonidan qator muhim farmonlar imzolanishini e’lon qilgan edi. Ular orasida koronavirus tarqalishiga qarshi kurash choralari ham bor. Prezident mamlakatdagi barcha davlat xizmatchilari uchun yuz kun niqob taqish rejimini joriy etmoqchi, shuningdek, shtatlar hukumatlari tomonidan shunga o‘xshash choralar ko‘rilishiga erishmoqchi edi.
Bundan tashqari, Bayden va vitse-prezident Kamala Xarris tomonidan ishlab chiqilgan pandemiyaga qarshi kurash rejasiga:
- COVID-19 test markazlarini ikki baravar ko‘paytirish;
- shaxsiy himoya vositalari tanqisligini bartaraf etish;
- pandemiyaga qarshi kurashish bo‘yicha fuqarolar va tashkilotlar uchun yagona tavsiyalar yaratish;
- keksa amerikaliklar va boshqa xavf ostidagilar sog‘lig‘ini himoya qilish dasturini ishlab chiqish kiritilgan.
AQShning sobiq prezidenti Donald Tramp mamlakatdagi karantin choralarini COVID-19’ning o‘zidan ham xavfliroq deb atagan.
Izoh (0)