Жо Байден АҚШ президенти хонасини ўзига мослаб ўзгартирди. Ҳатто қизил тугма ҳам столдан ғойиб бўлди

АҚШнинг янги президенти Жо Байден Оқ уйга кўчиб ўтиб, Овал хонани ўзига мослаб ўзгартирди, дея хабар қилмоқда Meduza.

Қайд этилишича, Байден стол остига Билл Клинтон даврида бўлган тўқ кўк гиламни тўшади, Бенжамин Франклин портретини деворга осиб қўйди. Шунингдек, ўзига яқин жойга ҳуқуқ ҳимоячиси Сесар Чавес ва АҚШнинг 33-президенти Гарри Трумэннинг бюстларини ўрнатди ҳамда ўзининг оилавий фотосуратларини жойлаштирди.

Шу билан бирга, Байден аввалги президент Дональд Трамп учун махсус ўрнатилган қизил тугмачани столдан олиб ташлади.

Ушбу тугма ядровий ракеталарни учириш ёки Twitter’да шошилинч бирор нарса ёзиш учун керак бўлмаган. Трамп тугмачани ҳар босганида идора ходими собиқ президентнинг энг севимли ичимлиги бўлган Diet Coke билан Овал хонага кириб келган.

Тугманинг йўқлигини журналист Том Ньютон Данн пайқади. У 2019 йилда интервью пайтида Трамп тугмачани босганини ва кўп ўтмай хонада Diet Coke ичимлиги билан бир киши пайдо бўлганини эслади.

Трамп қизил тугмачасини неча марта ишлатган деб ўйлайсиз? У бу тугмачадан кунига 10 мартадан ортиқ фойдаланган. 2018 йилда The New York Times ёзишича, ўша пайтдаги президент кунига 12 стакан Diet Coke ичган, шу билан бирга, ичимлик олиб келган ходимлар билан телевизорда кўрган янгиликлари ҳақидаги фикрлари билан бўлишган.

Аввалроқ Байден Трампнинг иқлим бўйича Париж битими ва ЖССТдан чиқиш тўғрисидаги қарорларини бекор қилгани, разведкага Навальнийнинг заҳарланиши ва АҚШга уюштирилган киберҳужумни ўрганиш топшириғини бергани ҳамда Трампнинг бошқа энг баҳсли фармонларини бекор қилгани ҳақида хабар берилганди.