Xorijiy davlatlarda o‘qib kelib, rahbarlik lavozimida faoliyat yuritayotgan o‘zbekistonlik yoshlarning ko‘pchiligi u yerdagi tajribani tez va shoshilinch amalga oshirishga urinmoqda. Bu haqda 19-yanvar kuni Prezident Shavkat Mirziyoyev raisligida o‘tkazilgan yig‘ilishda ta’kidlandi, deya xabar bermoqda “Daryo” muxbiri.
“Yoshlarga keng imkoniyatlarni yaratib beryapmiz, ularga katta-katta lavozimlarni ishonib topshiryapmiz. Ularda bilim bor, iste’dod bor. Afsuski, ayrimlarining milliy zamin, milliy ma’naviyatimizdan uzoqlashib ketgani sezilib qolmoqda. Ularning ko‘plari o‘zlari o‘qib kelgan xorijiy davlatlardagi tajribani tez va shoshilinch amalga oshirmoqchi bo‘lyaptilar, ammo bunday natijaga o‘sha davlatlar bir necha yuz yillar davomida erishgani haqida ular o‘ylab ko‘rmayapti. Men bunday yoshlarimizga milliy tariximiz va qadriyatlarimizni, o‘z ijtimoiy muhitini chuqur o‘rganishni maslahat bergan bo‘lar edim”, — dedi Shavkat Mirziyoyev.
Davlat rahbari bugungi davr yangicha fikrlash va ishlash, milliy aql markazlarini shakllantirishni talab etayotganini ta’kidladi.
“Afsuski, atrofimizdagi barcha ijtimoiy-siyosiy jarayonlarni chuqur tushunib, ta’sirchan tilda yetkazib beradigan tahlilchi va ekspertlarimiz juda-juda ham kam.
Bugun dunyoda insonning ongi va qalbini egallash tobora kuchayib bormoqda. Bu ishning boshida turgan kuchlar o‘z maqsadiga erishish yo‘lida targ‘ibotning barcha usullaridan unumli foydalanyapti. Shunday bir vaziyatda jamiyatimizni ma’naviy tahdidlardan himoya qilish borasidagi ilmiy-amaliy tadqiqotlarni tubdan qayta ko‘rib chiqishimiz zarur.
Umuminsoniy, milliy va diniy qadriyatlarimizga bepisandlik holatlariga qarshi kurashning metodologik asoslarini shakllantirishimiz lozim. Shu ma’noda Ma’naviyat va ma’rifat, Taraqqiyot strategiyasi, Islom sivilizatsiyasi markazlari, ijtimoiy-gumanitar yo‘nalishdagi tadqiqot institutlari haqiqiy aql markazlariga aylanishi kerak”, — dedi Prezident.
Izoh (0)