Xalq deputatlari Toshkent shahar kengashining 19-yanvar kuni bo‘lib o‘tgan 31-sessiyasida Jahongir Ortiqxo‘jayev Toshkent shahar Kengashidagi har bir deputatga 2 milliard so‘mdan pul berilib, o‘zlari lozim deb topgan maqsadlar uchun ishlatishi, Toshkent shahar Kengashi deputatlari ixtiyoriga budjet tushumining orttirib bajarilgan qismidan 120 milliard so‘m mablag‘ berilishi, shuningdek, Toshkent shahri tumanlaridagi deputatlarning har biri 100 million so‘m miqdoridagi mablag‘larni yo‘naltirish imkoniga ega bo‘lishini ma’lum qilgandi.
Oliy Majlis Qonunchilik palatasi deputati Rasul Kusherbayev bunga o‘z munosabatini bildirdi.
“To‘g‘risi, Toshkent shahar Kengashi deputatlariga havasim kelyapti. Boisi joylarda saylovchilar bilan uchrashuvlar vaqti biz mamlakat miqyosida qabul qilayotgan qonunlar va davlat budjeti haqida ma’lumot berishimizga qaramay, saylovchilar o‘zi yashayotgan ko‘cha qachon ta’mirlanishi, simyog‘ochlar qachon almashtirilishi, qachon ichimlik suvi kelishi kabi masalalar bo‘yicha savollar berishadi. Ularga shu ko‘proq qiziq. Bu ham tabiiy hol.
Afsuski, deputatda bu kabi alohida muammolarni hal etish uchun so‘rov, iltimos va murojaat kiritish huquqi bor, xolos. Alam qiladigani, joyida aniqlagan muammoni tezda bartaraf etish uchun mablag‘ni yo‘naltirish imkoni yo‘q: yo qaysidir vazirlik yo hokimlikka yalinish kerak. Va natija ham shundan kelib chiqadi”, — degan u.
Kusherbayev har bir Oliy Majlis deputatlari uchun ham shunday amaliyot qilinsa, deputatlardan saylovchilarning roziligi oshishini ta’kidlagan.
“Bu o‘rinda Xalq deputatlari Toshkent shahar Kengashi va hokimlik o‘rtasidagi ushbu qadamni chin dildan qo‘llab-quvvatlayman va boshqa hududlar ham namuna olsa bo‘ladigan tajriba deb hisoblayman. Albatta, agar hududlardagi yakkahokim, Kengash raisi bo‘lgan rahbarlar sal deputatlar uchun ham qayishib, ular bilan hisoblashishni ‘o‘ziga past ketish’ deb tushunishmasa”, — deydi deputat.
Kusherbayev ushbu mablag‘lar saylovchilar tomonidan bildirilayotgan eng muhim muammolarni bartaraf etishga yo‘naltirilishini, bu orqali saylovchilar deputatning haqiqiy kuchini ko‘ra olishini ta’kidlagan.
Shahar hokimligi, shuningdek, bir vaqtning o‘zida tumanlar mahalliy budjeti tushumlarining orttirib bajarilgan qismidan mahallalardagi mavjud muammolarni joyida bartaraf etish uchun har bir mahalla fuqarolari yig‘ini raislariga 50 million so‘mdan ajratilishini (519 ta mahalla—jami qariyb 26 milliard so‘m) ma’lum qilgandi.
“Menimcha, shahar Kengashi va hokimlik jamoasi jamoatchilik bilan ishlash va hisoblashishni amalda ham o‘zining ustuvor masalasi sifatida ko‘ryapti. Xullas, bo‘layotgan o‘zgarishlarga ko‘z tegmasin”, — degan Oliy Majlis Qonunchilik palatasi deputati.
Izoh (0)