O‘zbekistonda 12 ta vazirlik Prezident hujjatlarining ijrosiga bepisand munosabatda bo‘lgani ma’lum qilindi

O‘zbekistonda Uy-joy kommunal xizmat ko‘rsatish, Oliy va o‘rta maxsus ta’lim vazirligi va yana 10 ta vazirlikda Prezident topshiriqlarini bajarmaslik, muddatidan kechiktirib bajarish yoki sifatsiz bajarish holatlari aniqlangan. Bu haqda adliya vazirining o‘rinbosari Xudoyor Meliyev AOKAda bo‘lib o‘tgan matbuot anjumanida ma’lum qildi, deya xabar bermoqda “Daryo” muxbiri.

Xudoyor Meliyevning aytishicha, Adliya vazirligi tomonidan olib borilgan o‘rganish natijasida 12 ta vazirlikning deyarli barchasida ijro intizomiga amal qilmaslik holatlari kuzatilgan.

“Energetika vazirligi va AKT vazirliklarida aholining e’tirozlariga sabab bo‘layotgani tufayli bevosita Prezident topshirig‘iga asosan o‘rganishlar olib borilmoqda. Hozirgi paytda Energetika vazirligi, Axborot texnologiyalar vazirligi, Jismoniya tarbiya va sport vazirliklarida hamda Davlat aktivlarini boshqarish agentligida o‘rganishlar ketyapti”, — dedi u.

Shuningdek, adliya vaziri o‘rinbosari ijro intimozi bo‘yicha yangi farmon qabul qilinadigan bo‘lsa, yana 22 ta sohani o‘rganish rejalashtirilganini ma’lum qildi.

Avvalroq Adliya vazirligiga qabul qilingan hujjatlarni mas’ullarga yetkazish, amaliyotda qo‘llashga ko‘maklashish va nazorat qilish bo‘yicha yangi tizim joriy etish vazifasi topshirilganligi haqida xabar berilgan edi.

Shuningdek, davlat rahbari uy-joy kommunal xizmat ko‘rsatish vaziri Muzaffar Soliyevni ishda yo‘l qo‘ygan kamchiliklari, qayta-qayta ogohlantirishlarga qaramay tegishli xulosa chiqarmagani uchun egallab turgan lavozimidan ozod qilgan edi. Oliy ta’lim vaziri Inomjon Majidov esa tizimda o‘zgarish qilolmagani uchun ishdan olingani aytilgan edi.

Bundan oldinroq davlat rahbari topshirig‘i bilan ustidan nazorat boshlangan ATK vazirligi 2020-yilda maktablarga eng ko‘p yordam bergan top-10 vazirliklar qatoriga kirgan edi.

Energetika vazirligiga esa aholi tomonidan juda ko‘plab e’tirozlar bo‘lmoqda. Jumladan, Buxoro viloyatining ikki tumanida aholi o‘z noroziligini yo‘lni to‘sib qo‘yish orqali bildirgan bo‘lsa, yosh bolakay uni she’r orqali ifoda etganligi haqida xabar berilgan edi. Buning ortida deputat Doniyor G‘aniyev energetika vazirining iste’fosini talab qilgan.