Singapur hukumati 2021-yil fevralidan boshlab aholini koronavirusga qarshi ommaviy vaksinatsiya qilishni boshlaydi. Mamlakat bir kunda 70 ming kishini emlashni rejalashtirmoqda, deb yozadi “TASS”.
Singapur Sog‘liqni saqlash vazirligi emlash uchun o‘nlab markazlar tashkil qilishni rejalashtirmoqda. Xususan, buning uchun sport zallari va maktab binolaridan foydalanish nazarda tutilgan. Bunday markaz mahalliy Changi aeroporti terminallaridan birida 18-yanvar kuni ochilgan. Bundan tashqari, maxsus muassasalarda, masalan, qariyalar uyida emlashni amalga oshiruvchi mobil guruhlar tuziladi.
Avvalroq, rejaga ko‘ra, Singapur aholisining asosiy qismi 2021-yil oxirigacha vaksinani bepul olishi mumkinligi ma’lum qilingandi.
Mamlakatda koronavirusga qarshi emlash birinchi bo‘lib tibbiyot xodimlarida, so‘ngra bosh vazir Li Syan Lun boshchiligidagi hukumat a’zolarida amalga oshirilgan.
Ma’lumot uchun, Singapur Pfizer/BioNTech, Moderna va Sinovac vaksinalaridan foydalanishni ko‘zda tutgan. Uchala vaksinadan faqat Pfizer/BioNTech rasman ma’qullangan.
Eslatib o‘tamiz, Singapurda 2020-yil noyabr oyida SARS-CoV-2 koronavirusiga qarshi antitanaga ega chaqaloq tug‘ilgandi. Shuningdek, singapurlik olimlar koronavirusni bir necha daqiqada aniqlaydigan test apparati hamda COVID-19 simptomlarini kuzatuvchi aqlli niqob yaratgan.
Izoh (0)