Сингапур ҳукумати 2021 йил февралидан бошлаб аҳолини коронавирусга қарши оммавий вакцинация қилишни бошлайди. Мамлакат бир кунда 70 минг кишини эмлашни режалаштирмоқда, деб ёзади «ТАСС».
Сингапур Соғлиқни сақлаш вазирлиги эмлаш учун ўнлаб марказлар ташкил қилишни режалаштирмоқда. Хусусан, бунинг учун спорт заллари ва мактаб биноларидан фойдаланиш назарда тутилган. Бундай марказ маҳаллий Чанги аэропорти терминалларидан бирида 18 январь куни очилган. Бундан ташқари, махсус муассасаларда, масалан, қариялар уйида эмлашни амалга оширувчи мобил гуруҳлар тузилади.
Аввалроқ, режага кўра, Сингапур аҳолисининг асосий қисми 2021 йил охиригача вакцинани бепул олиши мумкинлиги маълум қилинганди.
Мамлакатда коронавирусга қарши эмлаш биринчи бўлиб тиббиёт ходимларида, сўнгра бош вазир Ли Сян Лун бошчилигидаги ҳукумат аъзоларида амалга оширилган.
Маълумот учун, Сингапур Pfizer/BioNTech, Moderna ва Sinovac вакциналаридан фойдаланишни кўзда тутган. Учала вакцинадан фақат Pfizer/BioNTech расман маъқулланган.
Эслатиб ўтамиз, Сингапурда 2020 йил ноябрь ойида SARS-CoV-2 коронавирусига қарши антитанага эга чақалоқ туғилганди. Шунингдек, сингапурлик олимлар коронавирусни бир неча дақиқада аниқлайдиган тест аппарати ҳамда COVID-19 симптомларини кузатувчи ақлли ниқоб яратган.
Изоҳ (0)