Qirg‘iziston Pfizer kompaniyasining koronavirusga qarshi vaksinasidan texnik sabablarga ko‘ra voz kechish niyatida. Bu haqda respublika sog‘liqni saqlash vaziri Alimkadir Beyshenaliyev ma’lum qildi, deb yozadi “TASS”.
“Bizga Amerikaning Pfizer vaksinasi taklif etildi, u 70 daraja sovuq haroratda saqlanishi kerak. Bizda bunday sovitgichlar yo‘q, ularning har biri 4 ming dollar turadi. Budjetda bunday pullarimiz yo‘q, shuning uchun biz rad etishga majburmiz”, — dedi u.
Vazirning ma’lumotlariga ko‘ra, Pfizer vaksinasini saqlash uchun respublika 2 million dollarlik uskunalarni sotib olishi kerak bo‘lardi. Beyshenaliyevning aytishicha, Qirg‘iziston COVAX dasturi doirasida Pfizer kompaniyasi tomonidan ishlab chiqarilgan 1 million dozadan ortiq vaksinani bepul qo‘lga kiritishi kerak edi. Tez orada Bishkek maqbulroq saqlash sharoitlarini talab qiluvchi koronavirusga qarshi vaksina uchun yana bitta talabnoma berishni rejalashtirmoqda.
Shuningdek, vazirning ta’kidlashicha, respublika Rossiya bilan “Sputnik V” vaksinasini yetkazish bo‘yicha muzokaralarni davom ettirmoqda, u esa 2—18 daraja sovuqqacha haroratda saqlanishi mumkin, buning uchun Qirg‘iziston zarur uskunalarga ega. Beyshenaliyev vaqt o‘tishi bilan Qirg‘izistonda koronavirusga qarshi vaksinalardan biri ishlab chiqarila boshlashini istisno qilmadi, chunki “uni ishlab chiqarish uchun material qimmat emas”.
Pandemiya boshidan buyon 6,5 million aholiga ega Qirg‘izistonda 82 mingdan ortiq odam koronavirusga chalindi (aholining 1,3 foizi). Ularning qariyb 80 ming nafari sog‘aydi, 1390 nafari vafot etdi. Mamlakatda 2020-yilning martida e’lon qilingan favqulodda vaziyat rejimi amal qilishda davom etmoqda.
Mavzuga doir:
Izoh (0)