Germaniya hukumati FFP2 sinfidagi professional respirator niqoblarini majburiy taqishni joriy etishni rejalashtirmoqda. Bu haqda Bild gazetasiga tayanib, “RBK” xabar berdi.
Qayd etilishicha, ayni paytda Germaniyaning yirik federal shtati Bavariya aholisiga majburiy ravishda respirator taqib yurish joriy qilingan. Respiratorlarni jamoat transportida va do‘konlarda taqib yurish majburiy etib belgilangan.
Xabarda aytilishicha, 19-yanvar kuni Germaniya kansleri Angela Merkel mamlakatning barcha 16 ta federal shtati rahbarlari bilan uchrashgan. Uchrashuvda mamlakatning barcha aholisini FFP2 respiratorlaridan majburiy foydalanish to‘g‘risidagi taklif muhokama qilingan. Nashr ushbu cheklovga oid taklif ma’qullanish ehtimoli borligini bildirgan. Uchrashuvda, shuningdek, maktablarni yopish, masofaviy talablarni uzaytirish masalasi ham ko‘rib chiqilgan.
FFP2 respiratorlarini taqish talabi Bavariyada 18-yanvardan beri amal qilmoqda. Hukumatning ushbu qarori respiratorlarning qimmatligi tufayli har xil qabul qilindi. Ularning chakana narxi bir donasi uchun ikki yevrodan besh yevrogacha bo‘lib, sakkiz soat ishlatilgandan so‘ng uni almashtirish kerak.
Spiegel gazetasi bilan suhbatlashgan virusologlar respirator yaxshiroq himoya vositasi ekanligini bildirgan. Ammo hukumat majburiy taqishni joriy qilgan taqdirda aholini respiratorlar bilan bepul ta’minlashi kerakligini ta’kidlagan. “Yashillar” partiyasi yangi qoida hech bo‘lmaganda uni sotib olishga qodir bo‘lmaganlar uchun bepul FFP2 niqoblarini taklif qiladigan dastur bilan mustahkamlanishi kerakligini ta’kidlagan.
16-dekabrdan boshlab Germaniyada qat’iy karantin choralari amal qilmoqda. Mamlakatda oziq-ovqat, uy-ro‘zg‘or buyumlari va hayotiy muhim mahsulotlar sotiladigan ayrim boshqa do‘konlardan tashqari qolgan barcha savdo shoxobchalari yopilgan. Shuningdek, sartaroshxona, muzey, teatr, go‘zallik salonlari ham yopilgan. Maktab o‘quvchilari masofadan turib o‘qimoqda. Berlin va Brandenburgda jamoat transportida va do‘konlarda himoya vositalarini taqish majburiy. Ammo hozirda himoya toifasiga talablar yo‘q.
25-yanvardan boshlab jamoat joylarida respirator taqish talabi ham Avstriyada kuchga kiradi. Kansler Sebastyan Kurz bu qarorni 17-yanvarda e’lon qildi. Mamlakat hukumati kam daromadli fuqarolarga bepul niqob olish huquqini kafolatlashni va’da bergan.
Robert Kox instituti ma’lumotlariga ko‘ra, Germaniyada pandemiya boshlangandan beri 2 milliondan ortiq COVID-19 holati qayd etilgan, 47,7 ming kishi vafot etgan. Avstriyada esa mamlakat Sog‘liqni saqlash vazirligining ma’lumotlariga ko‘ra, 394,9 ming kishi kasallangani aniqlangan, 7,1 ming kishi vafot etgan.
Izoh (0)