Самарқанд вилояти Каттақўрғон тумани Пайшанба шаҳарчаси «Пайшанба» деҳқон бозори «Пайшанба» шаҳарча фуқаролар йиғинида «Шавкат Миромонович Мирзиёев» оилавий корхонаси фаолият юритади. Корхона ҳақидаги маълумотлар билан Корхона ва ташкилотларнинг ягона давлат регистри (КТЯДР)да танишиш мумкин.
Корхона 2020 йил 14 февраль куни Давлат хизматлари маркази томонидан рўйхатга олинган. Регистр маълумотларига кўра, устав фонди 1000 (минг) сўмни ташкил этади. Корхонанинг 50 фоизи улуши Шохруз Тошпўлатовга, қолган 50 фоизи Абдулла Тошевга тегишли. Регистр маълумотларига кўра, унинг асосий фаолият тури — овқатланишни ташкил қилишнинг бошқа турлари.
Корхона раҳбари Абдулла Тошевнинг «Дарё» мухбири билан суҳбатда маълум қилишича, ҳозирда корхона ҳузуридаги ташкил этилган ошхона ва пайнет шохобчаси аҳолига хизмат кўрсатмоқда. Бундан ташқари, корхона авиакасса, яъни туризм хизматларини кўрсатиш билан ҳам шуғулланади. Бироқ пандемия даврида бу йўналишдаги ишлар вақтинча тўхтаб қолган.
Абдулла Тошевнинг таъкидлашича, у ва унинг иш бўйича шериклари президент Шавкат Мирзиёев олиб бораётган сиёсатдан қувониб, оилавий корхонага унинг номини қўйганини маълум қилди.
«Тадбиркорлик фаолиятимни мактабни битириш арафасида бошлаганман. 27 йилдан бери шу соҳадаман. Очиғи, авваллари тадбиркор сифатида кўп қийинчилик кўрганмиз. Ҳозирги президентимиз давлат раҳбари бўлгач, йўлларимиз очилди, мен каби тадбиркор ва бизнесменлар қўллаб-қувватланяпти. Уларнинг олиб бораётган сиёсатидан қувониб, оилавий корхонамизга ‘Шавкат Миромонович Мирзиёев’ номини қўйишга қарор қилдик», — дейди тадбиркор.
«Бугун эгизак фарзандли бўлган кўпчилик болаларига катта орзулар билан президентнинг исм-фамилиясини қўймоқда. Мен ҳам яхши ниятда корхонамизга шу номни қўйдим. Бу номни беришдан олдин туманимизнинг собиқ ҳокими, раҳматли Аъзамхон ака Баҳромовдан маслаҳат сўраганимда, улар фикримга қўшилиб, қўллаб-қувватлаган», — дея қўшимча қилди Абдулла Тошев.
Унинг таъкидлашича, корхонани «Шавкат Миромонович Мирзиёев» номи билан рўйхатдан ўтказишда давлат органлари томонидан ҳеч қандай эътироз ёки қаршилик бўлмаган.
«Аммо корхона фаолияти йўлга қўйилганидан сўнг бу ном кўпчиликда қизиқиш уйғотган, турли савол ва илиқ фикрлар билдирилган. Корхона номини баннерларга ёзиб, реклама сифатида бирор жойга илиб қўймаганмиз. Бу ном фақат ҳужжатларда ёзилган, уни банк, солиқ ходимлари билади, холос», — деди «Шавкат Миромонович Мирзиёев» оилавий корхонаси раҳбари.
Аввалроқ, 2020 йил июнида Сурхондарёда «Вой Мани Окаҳонларим» номли, йирик шохли қорамолларнинг сут берадиган зотларини кўпайтириш билан шуғулланувчи оилавий корхона рўйхатдан ўтказилган эди. Кейинчалик корхона номи «Акбар Али Адолат» деб ўзгартирилган.
2020 йил майида Жиззах вилоятида «Вапше маладес бала» номли, кенг ассортиментдаги товарлар улгуржи савдоси бўйича агентлар фаолияти билан шуғулланувчи компания рўйхатдан ўтказилгани маълум бўлган эди.
2019 йил августида эса Тошкентда «Любая бизнес хороша» номли масъулияти чекланган жамият ташкил этилган эди. КТЯДР маълумотларига кўра, корхона маиший электр товарлар улгуржи савдоси билан шуғулланади.
Халқ орасида оммалашиб, «қанотли жумла»га айланган иқтибос ва нақоратларнинг компаниялар номига айланаётганига муносабат билдираркан, Ўзбекистон адлия вазири Русланбек Давлетов буни «енгиллик самараси» деб атаган эди. «Хоҳлаган одам интернет орқали ‘Любая бизнес хороша’ ва бошқа номдаги МЧЖларни рўйхатдан ўтказди. Бу озодлик, енгиллик дегани», — деганди вазир.
Изоҳ (0)