2020-yilda O‘zbekistondagi tijorat banklari tomonidan 77 274 nafar jismoniy shaxsga ipoteka kreditlari ajratilgan, deb xabar beradi Markaziy bank. Bunda ajratilgan mablag‘larning umumiy qiymati 9,1 trillion so‘mni tashkil etmoqda (2019-yilga nisbatan 1,1 trillion so‘mga ko‘p).
Ma’lum qilinishicha, 2020-yilda ajratilgan ipoteka kreditlari 2019-yilga nisbatan Toshkent shahrida (o‘tgan yilga nisbatan 1,84 trillion so‘mga ko‘p), Navoiy (152,1 milliard so‘mga), Sirdaryo (122,8 milliard so‘mga) va Samarqand (225 milliard so‘mga) viloyatlarida o‘sgan.
Ipoteka kreditlarining 5,1 trillion so‘mi (jami ajratilgan kreditlarning 56,1 foizi) “Qishloq qurilish invest” IK hamda “O‘zshahar qurilish invest” IK tomonidan qurilgan uylarni, 3,7 trillion so‘mi (40,8 foizi) birlamchi bozordagi uylarni (jumladan, 1,7 trillion so‘mi yangi tartib doirasida ajratilgan), 0,3 trillion so‘mi (3,1 foizi) ikkilamchi bozordagi uylarni sotib olish uchun ajratilgan.
Ipoteka kreditlarining 749 milliard so‘mi (42,9 foizi) 1 va 2 xonali xonadonlarni, 998 milliard so‘mi esa (57,1 foizi) 3 va undan ko‘p xonali xonadonlarni sotib olish uchun berilgan. Ajratilgan mazkur ipoteka kreditlarining eng yuqori ulushlari Samarqand viloyati (422,1 milliard so‘m), Toshkent shahri (343,5 milliard so‘mi), Farg‘ona viloyati (174,1 milliard so‘m) hamda Surxondaryo viloyatlari (163,1 milliard so‘mi) hissasiga to‘g‘ri kelmoqda.
Izoh (0)