20-yanvar kuni Ohangaron tumani hududida joylashgan “Yangi Angren” IESning 5-energoblogida portlash sodir bo‘lgani haqida xabar berilgan edi. Ekologiya va atrof muhitni muhofaza qilish davlat qo‘mitasining ma’lum qilishicha, hodisa oqibatida yong‘in kelib chiqib, atmosfera havosiga ifloslantiruvchi moddalar tarqash holati kuzatilgan.
Yong‘in Favqulodda vaziyatlar vazirligining hududiy bo‘limlari jalb qilingan holda bartaraf etilgan. Atmosfera havosining ifloslanish darajasini aniqlash uchun esa Davlat ekologiya qo‘mitasining mobil ekologiya laboratoriyasi orqali havo sifati tahlil qilingan.
Tahlil ishlarini amalga oshirish chog‘ida shamol tezligi sekundiga 3,63-6,14 metrni tashkil etgan bo‘lsa, havo harorati 12,50S ni tashkil qilgan.
“Yong‘in natijasida hosil bo‘lgan qora tutun shamol tezligi va uning harakatlanishi yuqoriga bo‘lganligi sababli korxonaning ishlab chiqarish hududidan tashqarisida aholi yashash punktida o‘tkazilgan tahlil natijalarida o‘lchovda bo‘lgan ifloslantiruvchi moddalar (chang, azot oksidi, azot ikki oksidi, uglerod oksidi, ammiak, oltingugurt oksidi, farmaldegid, fenol, vodorod ftoridi, vodorod sulfidi, uglevodorodlar, metan) bo‘yicha belgilangan me’yorlardan ortiq chiqish holatlari kuzatilmadi”, — deyiladi xabarda.
Eslatib o‘tamiz, portlash oqibatida uch kishi halok bo‘lgandi. Yana uch kishi turli darajada kuyish tan jarohati olgan. Ayni paytda ular shifoxonada shifokorlar nazorati ostida bo‘lib, ahvoli barqaror deb baholanmoqda. Vafot etganlar hamda jarohat olganlarning oila a’zolariga moddiy va ma’naviy yordam ko‘rsatildi.
Hodisa yuzasidan Angren shahar prokuraturasi tomonidan tergovga qadar tekshiruv harakatlari olib borilmoqda.
Izoh (0)