2020 йилда Ўзбекистондаги тижорат банклари томонидан 77 274 нафар жисмоний шахсга ипотека кредитлари ажратилган, деб хабар беради Марказий банк. Бунда ажратилган маблағларнинг умумий қиймати 9,1 триллион сўмни ташкил этмоқда (2019 йилга нисбатан 1,1 триллион сўмга кўп).
Маълум қилинишича, 2020 йилда ажратилган ипотека кредитлари 2019 йилга нисбатан Тошкент шаҳрида (ўтган йилга нисбатан 1,84 триллион сўмга кўп), Навоий (152,1 миллиард сўмга), Сирдарё (122,8 миллиард сўмга) ва Самарқанд (225 миллиард сўмга) вилоятларида ўсган.
Ипотека кредитларининг 5,1 триллион сўми (жами ажратилган кредитларнинг 56,1 фоизи) «Қишлоқ қурилиш инвест» ИК ҳамда «Ўзшаҳар қурилиш инвест» ИК томонидан қурилган уйларни, 3,7 триллион сўми (40,8 фоизи) бирламчи бозордаги уйларни (жумладан, 1,7 триллион сўми янги тартиб доирасида ажратилган), 0,3 триллион сўми (3,1 фоизи) иккиламчи бозордаги уйларни сотиб олиш учун ажратилган.
Ипотека кредитларининг 749 миллиард сўми (42,9 фоизи) 1 ва 2 хонали хонадонларни, 998 миллиард сўми эса (57,1 фоизи) 3 ва ундан кўп хонали хонадонларни сотиб олиш учун берилган. Ажратилган мазкур ипотека кредитларининг энг юқори улушлари Самарқанд вилояти (422,1 миллиард сўм), Тошкент шаҳри (343,5 миллиард сўми), Фарғона вилояти (174,1 миллиард сўм) ҳамда Сурхондарё вилоятлари (163,1 миллиард сўми) ҳиссасига тўғри келмоқда.
Изоҳ (0)