АҚШнинг амалдаги президенти Дональд Трамп 73 кишини афв этди, шунингдек, яна 70 кишининг жазолари енгиллаштирилган. Бу ҳақда Оқ уй сайтига таяниб «Коммерсантъ» хабар берди. Афв этилганлар орасида президентнинг собиқ маслаҳатчиси Стивен Бэннон ҳам бор. У ва яна бир неча киши Мексика билан чегарада қурилаётган деворларга хайрия қилинган маблағлардан 25 миллион долларни талон-торож қилганликда айбланган.
Бундан ташқари, афв этилганлар қаторида россиялик Мария Бутина билан ишқий муносабатда бўлган Республикачилар партиясининг сиёсий консултанти Пол Эриксон ва Дональд Трампнинг тарафдори, тадбиркор Эллиотт Бройди ҳам бор.
Дональд Трамп афв этилганлар қаторига ўзини, оиласи ва адвокати Руд Жулианини қўшмаган. Шунингдек, афв этилганлар орасида WikiLeaks асосчиси Жулиан Ассанж ва Миллий хавфсизлик агентлиги ҳамда Марказий разведка бошқармасининг собиқ ходими Эдвард Сноуден йўқ.
Аввалроқ Трамп Байденнинг инаугурациясидан бир кун аввал коронавирус туфайли АҚШга киришга қўйилган тақиқни бекор қилгани ҳамда ўзининг сўнгги иш кунида у юзга яқин кишини афв этишни ҳам режалаштиргани ҳақида хабар берилганди.
20 январь куни Тошкент вақти билан соат 22:00 да АҚШнинг навбатдаги президенти — Жо Байденнинг инаугурацияси бўлиб ўтади. Трамп ушбу маросимда хайрлашув мурожаати билан чиқиш қилади.
Изоҳ (0)