Talabalar yotoqxonalari xususiy bo‘lsa, talabalarga ko‘rsatilayotgan xizmatning ham sifati oshadi. Bu haqda 19-yanvar kuni bo‘lib o‘tgan Xalq deputatlari Toshkent shahar kengashining o‘ttiz birinchi sessiyasida Toshkent shahar hokimi Jahongir Ortiqxo‘jayev aytib o‘tdi.
Sessiya ishida Toshkent shahar hokimi Jahongir Ortiqxo‘jayev 2021-yilda poytaxtda amalga oshirilishi rejalashtirilgan ishlar haqida ma’lumot berdi. Poytaxt hokimi o‘z ma’ruzasida talabalarni yotoqxona bilan ta’minlash ishlarini o‘rganib chiqishni taklif qildi.
“Yotoqxona bilan ta’minlanmagan talabalarning necha nafari qancha pulga ijaraga uy olish imkoniyatiga egaligi haqida ma’lumot bo‘lsa, tadbirkorlarga uni taqdim etib, yotoqxona qurdirish imkoni bo‘ladi. Yotoqxonalar xususiy bo‘lsa, talabalarga ko‘rsatilayotgan xizmatning ham sifati oshadi”, – dedi Jahongir Ortiqxo‘jayev.
Shahar hokimining so‘zlariga ko‘ra, deputatlar 2020-yili budjetdan ortib qolgan pullarni sarflashda talabalar yotoqxonalariga e’tibor bermagan.
“Bu yil ortiqcha pulimiz taxminan shuncha bo‘ladi, uni deputatlar o‘zlaringiz bo‘lib bering. Kengashlar qaranglar, qaysi sohaga qancha pul ajrataylik, deb deputatlarning o‘z ixtiyoriga qo‘ydim. Lekin men u yerda yotoqxonalarni ko‘rmadim. Demak, deputatlarimiz buni aktual masala deb hisoblashmagan”, – dedi u.
Izoh (0)