Xalq deputatlari Toshkent shahar Kengashining 31-sessiyasi 2020-yilning 19-yanvar kuni ish boshladi va unda shahar hokimi Jahongir Ortiqxo‘jayev ishtirok etdi.
Sessiya davomida hokim og‘ir pandemiyadan so‘ng esdalik sifatida shaharga 30 milliard so‘mlik daraxt ekish taklifini bildirdi.
“Hurmatli deputatlar, ruxsat bersanglar, 30 milliardga shaharga daraxt ekish imkoni bor. Jamoatchilik, blogerlar, jurnalistlar qayerga daraxt ekishni taklif bersalar, sifatli daraxtlarni olib kelib eksak, o‘ylashimcha, 2021-yilda og‘ir pandemiyadan keyingi yilga chiqqanimizga bir esdalik bo‘lib qolardi” – deydi shahar hokimi.
Shuningdek, Jahongir Ortiqxo‘jayev yana 50 milliard so‘m mahallalarga bolalar maydonchalari qurishga, ta’lim yoki tibbiyot sohasiga va boshqa siyosiy-ijtimoiy sohalarga sarflanishini taklif qildi.
Avvalroq O‘zbekistonda noqonuniy kesilgan har tup daraxt uchun 100 tup ko‘chat ekishni majburiy etish taklif qilingani, “Poytaxt” savdo markazi ro‘parasidagi qurilish maydonidagi 100 dan ortiq daraxtlar xatlovdan o‘tkazilgani hamda Sergelida daraxtlarning ekskavator bilan qo‘porib tashlanishi oqibatida o‘simlik dunyosiga 151 mln so‘mlik zarar yetkazilgani haqida xabar berilgandi.
Izoh (0)