Andijon viloyatining Buloqboshi tumanida yashovchi fuqaro qarz so‘raganida unga qarz bermagan va haqoratomuz kulgan ayolni o‘ldirdi, deya xabar berdi “Daryo” muxbiri.
Jinoyat ishlari bo‘yicha Andijon viloyat sudi sudya katta yordamchisi Komronshoh Rasulovning ma’lum qilishicha, Buloqboshi tumanida yashovchi Ulug‘bek Yo‘ldoshev (ism-familiyalar o‘zgartirilgan) 2020-yilning iyun oyida to‘qqiz yoshli farzandi Murod Karimovning bosh sohasidan olgan tan jarohatini davolatish uchun qo‘shnisi Nargiza Esonovadan qarz so‘ragan. Qo‘shni ayol esa unga pul bermasligini aytib, erkak kishi bo‘la turib, ayol kishidan pul so‘rashga uyalishi kerakligini, biron-bir joyda ishlamayotgan bo‘lsa, kelgusida qarzini qaytarishiga ham shubha qilayotganini bildirgan va haqoratomuz kulgan. Bunday javobdan g‘azablangan Ulug‘bek qo‘shnisini qasddan o‘ldirib, mol-mulkini qo‘lga kiritishni maqsad qilgan.
Sud jarayonida aniqlik kiritilishicha, qo‘shni ayolning eri va farzandlari xorijga ishlashga ketgani uchun oqshom paytida unga jiyani hamrohlik qilgan. Ulug‘bek Yo‘ldoshev aynan jiyanining kelmay qolishini kutib, 2020-yil 15-avgust kuni qo‘shni ayolning bir o‘zi qolganidan foydalanadi va shu kuni soat 23:30 da qo‘shnisining uyiga 50 sm uzunlikdagi temir truba va oshxonadagi xo‘jalik pichog‘i bilan kelgan.
Ulug‘bek qo‘shni ayolning yotoqxonasiga ortidan kirib, unga tashlangan va qo‘lidagi temir truba bilan bosh, qo‘l, kaft va peshona sohalariga bir necha marta urib, qasddan o‘ldirgan. Shundan so‘ng mehmonxonadagi sandiqdan 100 dollar va 1 million 300 ming so‘m pulni bosqinchilik yo‘li bilan qo‘lga kiritib, hodisa joyidan yashiringan.
Sud raisi Nosirjon Rasulov Ulug‘bek Yo‘ldoshevni Jinoyat kodeksining 97-moddasi 2-qismi “i” bandi (tamagirlik niyatida odam o‘ldirish) hamda 164-moddasi 3-qismi “v” (uy-joyga g‘ayriqonuniy ravishda kirgan holda bosqinchilik) “g” bandi (badanga og‘ir shikast yetkazgan holda sodir etilgan bosqinchilik) bilan aybli deb topib, uni 17 yil 6 oy muddatga ozodlikdan mahrum qilgan.
Izoh (0)