Mirzacho‘l tumanining sobiq hokimi Komil Xolmurodov Jizzax shahrining yangi hokimi etib tayinlandi. Bu haqda viloyat hokimligi matbuot xizmati xabar berdi.
19-yanvar kuni Xalq deputatlari Jizzax shahar Kengashining navbatdan tashqari sessiyasi o‘tkazilgan. Sessiya kun tartibidagi masala bo‘yicha viloyat hokimi Ergash Soliyev so‘zga chiqib, Jizzax shahar hokimi lavozimida ishlab kelayotgan Akbar Shukurov boshqa lavozimga o‘tgani munosabati bilan, Jizzax shahar hokimi lavozimiga Komil Xolmurodov nomzodini tavsiya etgan.
Ushbu taklif Xalq deputatlari Jizzax shahar Kengashi deputatlari tomonidan ma’qullangan. Komil Xolmurodov Xalq deputatlari Mirzacho‘l tuman Kengashining navbatdan tashqari sessiyasida tuman hokimi lavozimidan ozod etilgan edi.
Mirzacho‘l tumaniga esa shu paytgacha “Agrobank” ATBning Jizzax viloyati boshqarmasi boshlig‘i lavozimida ishlab kelayotgan Sherzod Ahmedov hokim etib tayinlangan.
Avvalroq Jizzax viloyatining Zafarobod va Forish tumanlariga ham yangi hokim tayinlangani haqida xabar berilgan edi.
Izoh (0)