Талабалар ётоқхоналари хусусий бўлса, талабаларга кўрсатилаётган хизматнинг ҳам сифати ошади. Бу ҳақда 19 январь куни бўлиб ўтган Халқ депутатлари Тошкент шаҳар кенгашининг ўттиз биринчи сессиясида Тошкент шаҳар ҳокими Жаҳонгир Ортиқхўжаев айтиб ўтди.
Сессия ишида Тошкент шаҳар ҳокими Жаҳонгир Ортиқхўжаев 2021 йилда пойтахтда амалга оширилиши режалаштирилган ишлар ҳақида маълумот берди. Пойтахт ҳокими ўз маърузасида талабаларни ётоқхона билан таъминлаш ишларини ўрганиб чиқишни таклиф қилди.
«Ётоқхона билан таъминланмаган талабаларнинг неча нафари қанча пулга ижарага уй олиш имкониятига эгалиги ҳақида маълумот бўлса, тадбиркорларга уни тақдим этиб, ётоқхона қурдириш имкони бўлади. Ётоқхоналар хусусий бўлса, талабаларга кўрсатилаётган хизматнинг ҳам сифати ошади», – деди Жаҳонгир Ортиқхўжаев.
Шаҳар ҳокимининг сўзларига кўра, депутатлар 2020 йили бюджетдан ортиб қолган пулларни сарфлашда талабалар ётоқхоналарига эътибор бермаган.
«Бу йил ортиқча пулимиз тахминан шунча бўлади, уни депутатлар ўзларингиз бўлиб беринг. Кенгашлар қаранглар, қайси соҳага қанча пул ажратайлик, деб депутатларнинг ўз ихтиёрига қўйдим. Лекин мен у ерда ётоқхоналарни кўрмадим. Демак, депутатларимиз буни актуал масала деб ҳисоблашмаган», – деди у.
Изоҳ (0)