Jizzax viloyati hokimining sanoatni rivojlantirish, kapital qurilish, kommunikatsiyalar va kommunal xo‘jalik masalalari bo‘yicha o‘rinbosari Akram Rahmonqulov lavozimidan ozod qilindi.
Viloyat hokimligi matbuot xizmati xabariga ko‘ra, ushbu lavozimga 2020-yilning noyabr oyidan buyon Qurilish vazirligi Pudrat va maxsus montaj ishlari bozorini muvofiqlashtirish boshqarmasi boshlig‘i bo‘lib ishlab kelayotgan Bahrom Nazarov tayinlandi.
Shuningdek, Forish tumani hokimi bo‘lib ishlab kelgan Abdivali Mustanov Jizzax viloyati hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari lavozimiga tayinlandi. Uning o‘rniga Ikrom Matiyev Forish tumaniga hokim etib tayinlangan.
Eslatib o‘tamiz, Shavkat Mirziyoyev 15-yanvar kuni poytaxt tumanlarining hokimlari va sektor rahbarlari bilan uchrashuvda Jizzaxdagi qulab tushgan bino voqeasiga munosabat bildirib, Akram Rahmonqulovni davlat siyosatiga xiyonat qilganlikda ayblagandi. “Jizzax viloyati hokimining qurilish bo‘yicha o‘rinbosari bizning siyosatimizga xiyonat qilgan. Buni hamma bilishi lozim. Uning butun to‘dasiga qonuniy jazo ko‘rish kerak. Sholi kurmaksiz bo‘lmaganidek, baribir eski zamonni qo‘msagan noinsoflar ham bor. Ular erkinlik, ochiqlik siyosatini tushunmaydi”, — degan edi davlat rahbari.
Shuningdek, Akram Rahmonqulovning qarindoshlari ijtimoiy va boshqa soha obyektlarini qurish bo‘yicha bir necha yuz milliard so‘mlik davlat buyurtmalarini qo‘lga kiritgani, uning o‘zi qarindoshlari yutgan tenderlarda komissiya raisi sifatida vakolatli shaxs bo‘lgani aniqlangandi.
Akram Rahmonqulov O‘zbekiston Respublikasi mustaqilligining yigirma to‘qqiz yilligi munosabati bilan “Sodiq xizmatlari uchun” medali bilan taqdirlangandi.
Izoh (0)