Rossiyada 18-yanvar, dushanba kunidan barcha fuqarolarni koronavirusga qarshi ommaviy emlash boshlandi, deb yozadi “RBK”.
18-yanvardan koronavirusga qarshi keng ko‘lamli emlashdan ommaviy vaksinatsiyaga o‘tish haqida prezident Vladimir Putin buyruq bergan. “Mixail Vladimirovich (Mishustin) menga bu sanoat rivojlanib, nafaqat va’da qilingan barcha standartlar va hajmlarni bajardi, balki vaksina ishlab chiqarish rejadagidan oshib ketdi, deb hisobot berdi. Biz keng ko‘lamli emlashdan ommaviy vaksinatsiyaga o‘tishimiz kerak”, — degan edi Putin.
Hozir Rossiyada koronavirus infeksiyasiga qarshi ikkita mahalliy vaksina ro‘yxatdan o‘tkazilgan, bular — Gamaleya nomidagi markazning “Sputnik V” vektorli preparati va “Vektor” markazining “EpiVakKorona” peptidli vakinasi. Shuningdek, tez orada aholini emlash dasturiga Chumakov markazining dorisi ham qo‘shilishi kutilmoqda, u esa bosh vazir o‘rinbosari Tatyana Golikovaning so‘zlariga ko‘ra, “yaqinda kelib qoladi”.
Rossiya SSV ommaviy emlash dasturi doirasida vaksinatsiya punktlarini ko‘paytirishni topshirdi. Sog‘liqni saqlash vaziri Mixail Murashkoning so‘zlariga ko‘ra, hozir 60 yoshdan oshgan odamlarni emlashga yuqori talab kuzatilmoqda, ularni emlash uchun dekabr oxirida ruxsat berilgan edi.
“Rospotrebnadzor” rahbari Anna Popova Rossiyada koronavirusga qarshi vaksinatsiya shunday tashkil etilishi kerakki, kuzga kelib jamoaviy immunitet paydo bo‘lishi kerak, dedi. Uning so‘zlariga ko‘ra, vaksinatsiyaning birinchi yilida mamlakat aholisining 60 foizini qamrab olish mumkin.
Ayni paytga kelib, qariyb 50 ta mamlakatda koronavirusga qarshi emlash boshlangan. Vaksinaning qabul qilingan dozalari bo‘yicha AQSh dunyoda yetakchilik qilmoqda, u yerda 12,2 milliondan ortiq odam vaksinaning birinchi dozasini qabul qilgan.
Ma’lumot uchun, “Sputnik V” koronavirusga qarshi birinchi rus vaksinasi 11-avgustda ro‘yxatdan o‘tkazildi. Hozirgi vaqtda Rossiyada fuqarolarni emlash bilan parallel ravishda vaksinani o‘rganish davom etmoqda. “Interfaks” ma’lumotlariga ko‘ra, 50 dan ortiq mamlakatdan 1,2 milliarddan ortiq dozada Rossiya vaksinasini sotib olish uchun arizalar kelib tushgan. Xususan, 29-dekabr kuni Argentina o‘z aholisini koronavirusga qarshi “Sputnik V” vaksinasi bilan emlashni boshladi.
Avvalroq O‘zbekiston Rossiyaning Gamaleya instituti tomonidan ishlab chiqarilgan 70 million doza vaksinani sotib olishi haqida Bloomberg xabar bergan edi.
Izoh (0)