Россияда коронавирусга қарши оммавий эмлаш бошланди

Россияда 18 январь, душанба кунидан барча фуқароларни коронавирусга қарши оммавий эмлаш бошланди, деб ёзади «РБК».

18 январдан коронавирусга қарши кенг кўламли эмлашдан оммавий вакцинацияга ўтиш ҳақида президент Владимир Путин буйруқ берган. «Михаил Владимирович (Мишустин) менга бу саноат ривожланиб, нафақат ваъда қилинган барча стандартлар ва ҳажмларни бажарди, балки вакцина ишлаб чиқариш режадагидан ошиб кетди, деб ҳисобот берди. Биз кенг кўламли эмлашдан оммавий вакцинацияга ўтишимиз керак», — деган эди Путин.

Ҳозир Россияда коронавирус инфекциясига қарши иккита маҳаллий вакцина рўйхатдан ўтказилган, булар — Гамалея номидаги марказнинг «Спутник V» векторли препарати ва «Вектор» марказининг «ЭпиВакКорона» пептидли вакинаси. Шунингдек, тез орада аҳолини эмлаш дастурига Чумаков марказининг дориси ҳам қўшилиши кутилмоқда, у эса бош вазир ўринбосари Татяна Голикованинг сўзларига кўра, «яқинда келиб қолади».

Россия ССВ оммавий эмлаш дастури доирасида вакцинация пунктларини кўпайтиришни топширди. Соғлиқни сақлаш вазири Михаил Мурашконинг сўзларига кўра, ҳозир 60 ёшдан ошган одамларни эмлашга юқори талаб кузатилмоқда, уларни эмлаш учун декабрь охирида рухсат берилган эди.

«Роспотребнадзор» раҳбари Анна Попова Россияда коронавирусга қарши вакцинация шундай ташкил этилиши керакки, кузга келиб жамоавий иммунитет пайдо бўлиши керак, деди. Унинг сўзларига кўра, вакцинациянинг биринчи йилида мамлакат аҳолисининг 60 фоизини қамраб олиш мумкин.

Айни пайтга келиб, қарийб 50 та мамлакатда коронавирусга қарши эмлаш бошланган. Вакцинанинг қабул қилинган дозалари бўйича АҚШ дунёда етакчилик қилмоқда, у ерда 12,2 миллиондан ортиқ одам вакцинанинг биринчи дозасини қабул қилган.

Маълумот учун, «Спутник V» коронавирусга қарши биринчи рус вакцинаси 11 августда рўйхатдан ўтказилди. Ҳозирги вақтда Россияда фуқароларни эмлаш билан параллел равишда вакцинани ўрганиш давом этмоқда. «Интерфакс» маълумотларига кўра, 50 дан ортиқ мамлакатдан 1,2 миллиарддан ортиқ дозада Россия вакцинасини сотиб олиш учун аризалар келиб тушган. Хусусан, 29 декабрь куни Аргентина ўз аҳолисини коронавирусга қарши «Спутник V» вакцинаси билан эмлашни бошлади.

Аввалроқ Ўзбекистон Россиянинг Гамалея институти томонидан ишлаб чиқарилган 70 миллион доза вакцинани сотиб олиши ҳақида Bloomberg хабар берган эди.