Samsung vitse-prezidentiga korrupsiya ishi bo‘yicha hukm o‘qildi

Seul sudi Samsung Electronics vitse-prezidenti Li Chje Yonni pora berganlikda ayblab, 2,5 yilga ozodlikdan mahrum etdi, deb xabar beradi “RBK”.

Li Chje Yon 2017-yilda 5 yilda ozodlikdan mahrum etilgandi. Ayblov versiyasiga ko‘ra, u 6 million dollardan ortiq miqdordagi pora berishga aloqador. Shuningdek, Li Chje Yon davlat Samsung C&T va Cheil Industries’ning o‘ziga ma’qul shartlarda birlashishiga ruxsat berishi uchun amaldorlarga 38 million dollar taklif qilgan yoki va’da bergan. Ammo bir yildan so‘ng sud Samsung Group rahbariga chiqarilgan hukmni shartliga o‘zgartirgan va u ozodlikka chiqqan.

2019-yilda sud Li Chje Yonning ishini qayta ko‘rib chiqish uchun quyi turuvchi instansiyaga yuborgan. Sudning hozirgi qaroriga ko‘ra, Li qamoqqa qaytadi, biroq hibsda o‘tgan bir yil muddati belgilangan jazo muddati hisobiga qo‘shiladi.

Korrupsiya mojarosi Janubiy Koreya sobiq prezidenti Pak Kin Xe bilan bog‘liq. Tergov Li Chje Yonni prezident Pak Kin Xening dugonasi Chxve Sun Silga tegishli kompaniyalarga katta miqdorda mablag‘ o‘tkazib berganlikda ayblagan.

2016-yil oxirida Pak Kin Xega impichment, aprelda esa ayblov e’lon qilingan edi. 2018-yilning fevralida Chxve Sun Sil 20 yil qamoqqa mahkum etilgan. Sobiq prezident esa 25 yilga ozodlikdan mahrum etilgan va 17,8 million dollar miqdorida jarimaga tortilgan.