Amerika prezidenti Donald Trampning safdoshlari prezident bilan aloqalaridan foydalangan holda sudlangan jinoyatchilarni afv etishni lobbilashtirish xizmatlari evaziga o‘n minglab dollar ishlab topgan. Bu haqda New York Times gazetasi hujjatlarga va manbalar bilan intervyularga tayanib xabar berdi, deb yozadi “RBK”.
Gazeta hamsuhbatlari iddao qilishicha, Tramp ko‘plab afv etish holatlaridan shaxsiy yoki siyosiy ittifoqdoshlarini mukofotlash uchun foydalangan. Gazeta ma’lumotlariga ko‘ra, Tramp saylovlardagi mag‘lubiyatiga qarshi chiqa olmasligi aniq bo‘lganidan keyin afv etishlar soni keskin o‘sgan.
Maqolada Tramp va uning yaqinlariga aloqador bir nechta lobbichi tilga olinadi. Xususan, sobiq federal prokuror Brett Tolmen o‘n minglab dollar pul orttirgan, u Oq uyga afv etish va jazolarni yumshatish masalalari bo‘yicha maslahatlar bergan. Bunday mukofotni Tolmen kamida uchta ish bo‘yicha qo‘lga kiritgan.
Afv etish imkoniyatlari haqida Trampning sobiq advokati Jon Daud ma’lum qilgan, u go‘yoki o‘z mijozlariga Tramp va uning yordamchisi Jared Kushner bilan aloqalaridan foydalanib, afv etishga erisha olishi haqida aytgan.
Yana bir lobbichi — Tramp shtabining sobiq maslahatchisi Karen Jorno maxfiy ma’lumotni fosh qilishda aybdor deb topilgan AQSh Markaziy razvedka boshqarmasi sobiq agenti Jon Kiriakuning afv etilishiga yordam bergan. Gazeta Jorno va Kiriaku o‘rtasidagi “prezident Donald Trampdan to‘liq afvga erishish to‘g‘risida”gi bitim nusxasini qo‘lga kiritgan, unga muvofiq, Jorno o‘z xizmatlari uchun 50 ming dollar va agar u afvga erishsa, mukofot tariqasida yana 50 ming dollar olishi kerak edi. Jornoning o‘zi Tramp bilan Kiriaku haqida hech qachon to‘g‘ridan to‘g‘ri gaplashmagani va uning ma’muriyatida afv etish iltimosi bilan lobbichilik qilmaganini aytdi.
Avvalroq CNN telekanali Oq uyga yaqin manbalariga tayanib, Tramp davlat rahbari lavozimidan ketishdan oldin bir qator shaxslarni afv etishi mumkinligini ma’lum qilgan edi. Shuningdek, The New York Times ma’lumotlariga ko‘ra, Tramp yordamchilari bilan prezidentlik muddati tugaguncha o‘zini afv etish imkoniyatini muhokama qilgan. Bundan tashqari, u o‘z oilasi a’zolarini va yaqinlarini oldindan afv etishi mumkinligi ham xabar berilgandi.
Izoh (0)