Xalqaro xokkey federatsiyasi (IIFH) Belarus Respublikasidan 2021-yilgi Jahon chempionati mezbonligini olib qo‘ydi.
IIHF bunga sabab sifatida mamlakatdagi xavfsizlik masalasi qoniqarli darajada emasligini ko‘rsatgan. Tashkilot ijroqo‘mi a’zolari mezbon mamlakatdagi vaziyatni o‘yinchilar, rasmiylar, muxlislar va OAV xodimlari uchun xavfsiz emas deb topgan. Shu sababli reglament asosida Minsk shahri (Belarus poytaxti) mezbonlik huquqidan mahrum etilgan.
Eslatib o‘tamiz, ushbu musobaqaning yana bir mezboni Latviya hisoblanadi. JCh—2021 Minsk va Riga shaharlari 21-maydan 6-iyunga qadar bo‘lib o‘tishi rejalashtirilgandi.
Hozircha musobaqaning yangi mezboni nomi ma’lum emas, bu masala keyinroq ko‘rib chiqilishi kutilmoqda. IIHF Latviyaning darajasini ko‘rib chiqadi. Tashkilot koronavirus pandemiyasi davrida musobaqani iloji boricha bir mamlakat hududida o‘tkazishni ma’qul ko‘rmoqda.
Qayd etish joiz, Belarusning mezbonlikdan quruq qolishiga mamlakatda bo‘lib o‘tgan prezidentlik saylovlaridan keyin yuzaga kelgan siyosiy vaziyat sabab bo‘ldi.
Avvalroq xokkey bo‘yicha Jahon chempionatining asosiy homiylari hisoblangan Skoda va Nivea kompaniyalari musobaqa Belarusda o‘tkazilgan taqdirda homiylikdan voz kechishini ma’lum qilgandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)