Халқаро хоккей федерацияси (IIFH) Беларусь Республикасидан 2021 йилги Жаҳон чемпионати мезбонлигини олиб қўйди.
ИИҲФ бунга сабаб сифатида мамлакатдаги хавфсизлик масаласи қониқарли даражада эмаслигини кўрсатган. Ташкилот ижроқўми аъзолари мезбон мамлакатдаги вазиятни ўйинчилар, расмийлар, мухлислар ва ОАВ ходимлари учун хавфсиз эмас деб топган. Шу сабабли регламент асосида Минск шаҳри (Беларусь пойтахти) мезбонлик ҳуқуқидан маҳрум этилган.
Эслатиб ўтамиз, ушбу мусобақанинг яна бир мезбони Латвия ҳисобланади. ЖЧ—2021 Минск ва Рига шаҳарлари 21 майдан 6 июнга қадар бўлиб ўтиши режалаштирилганди.
Ҳозирча мусобақанинг янги мезбони номи маълум эмас, бу масала кейинроқ кўриб чиқилиши кутилмоқда. ИИҲФ Латвиянинг даражасини кўриб чиқади. Ташкилот коронавирус пандемияси даврида мусобақани иложи борича бир мамлакат ҳудудида ўтказишни маъқул кўрмоқда.
Қайд этиш жоиз, Беларуснинг мезбонликдан қуруқ қолишига мамлакатда бўлиб ўтган президентлик сайловларидан кейин юзага келган сиёсий вазият сабаб бўлди.
Аввалроқ хоккей бўйича Жаҳон чемпионатининг асосий ҳомийлари ҳисобланган Skoda ва Nivea компаниялари мусобақа Беларусда ўтказилган тақдирда ҳомийликдан воз кечишини маълум қилганди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)