Франция президенти Эммануэль Макрон Туркия раҳбари Ражаб Тоййиб Эрдўғонга Париж ва Анқара ўртасидаги муносабатларни ривожлантириш таклифи битилган мактуб йўллади. Бу ҳақда Туркия ташқи ишлар вазири Мавлут Чавушўғлуга таяниб «Korrespondent.net» хабар берди.
«Икки кун олдин Макрондан ижобий мактуб олдик, унинг мазмуни муносабатларни ривожлантириш ва президентимиз билан учрашиш истагидан иборат. У ўз қўли билан турк тилида салом йўллаган: ‘Қадрли Тоййиб’», — дейди Чавушўғлу.
Туркия ТИВ раҳбарининг таъкидлашича, Эрдўғон Макроннинг мактубига ижобий муносабат билдирган.
«Президентимиз ‘мамнуният билан кўришамиз», деди. Гап аввало видеоконференция ва телефон музокаралари ҳақида кетмоқда», — дея қўйшимча қилади вазир.
Икки мамлакат ўртасидаги кескинлик 2020 йилнинг кузида Францияда содир бўлган қатор ҳужумлардан сўнг юзага келган. Маҳаллий ҳукумат буни «ислом террорчилари томонидан уюштирилган» деб баҳоланган.
Эслатиб ўтамиз, Францияда тарих фани ўқитувчиси ўқувчиларга Charlie Hebdo нашри томонидан чоп этилган Пайғамбар Муҳаммад (с.а.в.)нинг карикатура суратини кўрсатган. Шундан сўнг ўқитувчи чеченистонлик муҳожир томонидан ўлдирилган. Бу воқеа Францияда кенг жамоатчиликнинг муҳокамасига сабаб бўлди. Ўлдирилган ўқитувчи билан видолашиш маросимида Франция президенти Эммануэль Макрон мамлакат сўз эркинлигидан, жумладан, карикатура борасидаги эркинликдан воз кечмаслигини маълум қилган. Франция президентининг мазкур баёноти ортидан Яқин Шарқдаги баъзи мамлакатларда Францияда ишлаб чиқарилган маҳсулотларни бойкот қилиш бошланди.
Изоҳ (0)