Afg‘oniston va Iroqdagi amerikalik harbiylar soni har bir mamlakatda 2,5 minggacha kamaydi. Pentagon AQShning amaldagi prezidenti Donald Trampning rejasiga ko‘ra, o‘z askarlarining ushbu mamlakatlardagi harbiy ishtirokini qisqartirmoqda, deb yozadi Associated Press.
“Bugugi kunda AQShning Afg‘onistondagi harbiylari soni 2,5 ming kishini tashkil etmoqda. Ushbu qisqarish prezident Trampning qarori bo‘yicha amalga oshirilayotgani to‘g‘risida 17-noyabr kuni ma’lum qilgandim. Shu bilan birga, AQSh kuchlarining mamlakatdagi darajasi 2001-yildan buyon eng kam ko‘rsatkchga yetdi”, — deydi AQSh mudofaa vaziri vazifasini bajaruvchi Kristofer Miller.
Uning ta’kidlashicha, mamlakatda qolgan harbiylar Afg‘onistondagi ekstremistik guruhlarga qarshi harakatlarni davom ettirish va mahalliy hukumat kuchlarini o‘qitish uchun yetarli hisoblanadi.
Afg‘onistondagi Amerika kontingentining qisqartirilishi haqida 2020-yil 4-avgust kuni AQSh prezidenti Donald Tramp ham ma’lum qilgandi. U noyabr oyida harbiylar soni 4—5 ming nafar bo‘lishini bildirgan. O‘sha vaqtdagi ma’lumot bo‘yicha, Afg‘onistonda AQShning qariyb 8 ming nafar harbiyi bor edi.
Eslatib o‘tamiz, 2020-yil fevral Qatar poytaxti Dohada AQShning Afg‘oniston bo‘yicha maxsus vakili Zalmay Halilzod hamda “Tolibon” yetakchisining o‘rinbosari, harakatning Qatardagi ofisi rahbari mulla Abdulla G‘ani Barodar kelishuv bitimini imzolagan edi. Unda Amerikaning barcha qo‘shinlarini Afg‘onistondan olib chiqish ko‘zda tutilgan edi. “Tolibon” esa o‘z navbatida boshqa terrorchilik guruh vakillarini yashirmaslik va Afg‘oniston hukumati bilan to‘liq muzokaralar olib borish majburiyatini olgan edi.
Izoh (0)