Афғонистон ва Ироқдаги америкалик ҳарбийлар сони ҳар бир мамлакатда 2,5 минггача камайди. Пентагон АҚШнинг амалдаги президенти Дональд Трампнинг режасига кўра, ўз аскарларининг ушбу мамлакатлардаги ҳарбий иштирокини қисқартирмоқда, деб ёзади Associated Press.
«Бугуги кунда АҚШнинг Афғонистондаги ҳарбийлари сони 2,5 минг кишини ташкил этмоқда. Ушбу қисқариш президент Трампнинг қарори бўйича амалга оширилаётгани тўғрисида 17 ноябрь куни маълум қилгандим. Шу билан бирга, АҚШ кучларининг мамлакатдаги даражаси 2001 йилдан буён энг кам кўрсаткчга етди», — дейди АҚШ мудофаа вазири вазифасини бажарувчи Кристофер Миллер.
Унинг таъкидлашича, мамлакатда қолган ҳарбийлар Афғонистондаги экстремистик гуруҳларга қарши ҳаракатларни давом эттириш ва маҳаллий ҳукумат кучларини ўқитиш учун етарли ҳисобланади.
Афғонистондаги Америка контингентининг қисқартирилиши ҳақида 2020 йил 4 август куни АҚШ президенти Дональд Трамп ҳам маълум қилганди. У ноябрь ойида ҳарбийлар сони 4—5 минг нафар бўлишини билдирган. Ўша вақтдаги маълумот бўйича, Афғонистонда АҚШнинг қарийб 8 минг нафар ҳарбийи бор эди.
Эслатиб ўтамиз, 2020 йил февраль Қатар пойтахти Доҳада АҚШнинг Афғонистон бўйича махсус вакили Залмай Ҳалилзод ҳамда «Толибон» етакчисининг ўринбосари, ҳаракатнинг Қатардаги офиси раҳбари мулла Абдулла Ғани Бародар келишув битимини имзолаган эди. Унда Американинг барча қўшинларини Афғонистондан олиб чиқиш кўзда тутилган эди. «Толибон» эса ўз навбатида бошқа террорчилик гуруҳ вакилларини яширмаслик ва Афғонистон ҳукумати билан тўлиқ музокаралар олиб бориш мажбуриятини олган эди.
Изоҳ (0)