Tojikistonda COVID-19 bilan kasallangan bemor qolmadi, deya xabar bermoqda mamlakat Sog‘liqni saqlash vazirligiga tayanib CentralAsia.
Ta’kidlanishicha, 2021-yilning 13-yanvar holatiga ko‘ra, Tojikistonda koronavirus bilan kasallangan bironta bemor qolmadi. Mamlakat sog‘liqni saqlash va ijtimoiy muhofaza vazirligi shu kuni bergan xabarda koronavirusdan tuzalgan so‘nggi 3 nafar bemorga uyiga javob berilgani aytiladi.
Koronavirus pandemiyasi davrida Tojikistonda virusni yuqtirish bo‘yicha jami 13 308 holat aniqlangan. Bemorlarning 13 218 nafari sog‘aygan, 90 nafari vafot etgan.
Tojikistonda koronavirusni yuqtirish holati ilk marta 2020-yilning 30-aprelida tasdiqlangandi. Eng ko‘p kasallanish holatlari yoz va kuzda kuzatildi. 2021-yilda jami 12 ta holat qayd etilgan.
Ma’lum qilinishicha, 2021-yilning ikkinchi yarmida Tojikiston Sog‘liqni saqlash vazirligi fuqarolarni koronavirusga qarshi emlashni rejalashtirmoqda. Dastlab tibbiyot xodimlari, keksalar va surunkali yuqumsiz kasalliklarga chalingan tojikistonliklar emlanadi. Davlat departamenti rahbari Jamoliddin Abdullozodaning ta’kidlashicha, virus mamlakatda yozgacha butunlay yo‘q bo‘lib ketadi.
Avvalroq Tojikiston va O‘zbekiston o‘rtasida muntazam aviaqatnovlar tiklangani, Urgutning Tojikiston bilan chegaradosh qismida joylashgan “Jartepa” chegara bojxona posti eksport-import yuklari harakati uchun ochilgani hamda O‘zbekiston Tojikistonning janubida COVID-19 bilan kasallanganlarni qabul qilish markazini qurishi haqida xabar berilgandi.
Izoh (0)