Ўзбекистон Профессионал футбол лигаси 2021 йилги мавсумдан эътиборан клублар томонидан легионер футболчилар учун олинадиган маблағ миқдорини камайтиришни режалаштирмоқда. Бу ҳақда ташкилот раҳбари Диёр Имомхўжаев ўз Telegram каналида маълум қилди.
Мусобақалар ўтказиш регламентига кўра ҳар бир клуб легионер футболчини рўйхатдан ўтказганлик учун 50 миллион сўм тўловни амалга оширади. Пандемия даврида ЎзПФЛ Про лига клубларига енгиллик яратиб, мазкур суммани қисқартирган ҳамда тўлов 25 миллионгача камайганди. Ташкилот Про лига клублари учун мазкур енгилликни келаси мавсумда ҳам сақлаб қолиши мумкин. Қайд этиш жоиз, уч йил аввал легионер футболчилар учун тўлов 100 миллион сўмни ташкил қилган.
Шунингдек, бунга қадар ҳар бир клуб легионер футболчи учун алоҳида тўлов қилган. Яъни, легионер футболчи мавсум ўртасида бошқа клубга кўчиб ўтса, мазкур футболчи учун яна алоҳида тўлов мажбурияти бўлган. Имомхўжаевнинг сўзларига кўра, ташкилот бу талабни ҳам енгиллаштириши мумкин. Бунда бир легионер учун мавсумга бир марта тўлов қилинади. Легионер мавсум ўртасида бошқа клубга ўтса, у учун яна алоҳида тўлов мажбурияти бўлмайди.
ЎзПФЛ бир неча йиллардан буён Ўзбекистон клублари шарафини ҳимоя қилаётган легионерлар учун тўлов тартибини ўзгартириши мумкин. Бунда узлуксиз тўрт мавсум Ўзбекистон лигаларида тўп сураётган легионер футболчи келаси мавсумларда ҳам мамлакат клублари билан шартнома имзоласа, уларни тўловлардан озод этиш масаласи кўтарилган. Қайд этиш керак, ҳозиргача Кахи Махарадзе (Грузия), Драган Черан (Сербия), Арслонмурод Амонов (Туркманистон) каби легионерлар бу йўлни босиб ўтган. Улар 2021 йилда ҳам Ўзбекистонда тўп сурса, клублар бу футболчилар учун тўловларни амалга оширмайди.
Қоидага кўра ЎзПФЛ ўз таклифларини Ўзбекистон футбол ассоциацияси билан келишганидан кейингина мазкур бандлар кучга киради.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)