Shavkat Mirziyoyev 15-yanvar, juma kuni Toshkent markazidagi Islom Karimov ko‘chasida Oliy Majlis Senatining yangi (sobiq TIV) binosini ko‘zdan kechirdi, deb xabar bermoqda Prezident matbuot xizmati.
Loyihaga ko‘ra, 6 qavatli eski bino tubdan rekonstruksiya qilinib, qo‘shimcha obyektlar quriladi. Bugungi kunda muhandislik tarmoqlari montaj qilinmoqda.
Yangi binoda Oliy Majlis palatalarining qo‘shma majlisini o‘tkazish uchun 280 o‘rinli zal tashkil etilmoqda. U milliy naqshlar bilan bezatilgan bo‘ladi.
“Parlamentimiz faol ishlayapti. Majlislar paytida bitta qonun loyihasi soatlab muhokama qilinadi. Shuning uchun ishtirokchilarning harakatlanishi, salomatligi, yoshi bilan bog‘liq har bir jihatni e’tiborga olish, shunga yarasha qulaylik yaratish zarur. Zalga quyosh nuri tushib tursa, kayfiyatga, ishga yaxshi ta’sir qiladi”, — degan Shavkat Mirziyoyev.
Yangi binoda, shuningdek, delegatsiyalar bilan uchrashuvlar, matbuot anjumanlari, OAV vakillari uchun ham barcha sharoitlar yaratiladi.
