Шавкат Мирзиёев Юнусобод туманидаги «Янгибоғ» маҳалласига ташриф буюрди, дея хабар қилмоқда Президент матбуот хизмати.
Таъкидланишича, аҳоли турмуш даражасида маҳаллалардаги шароит, инфратузилма ва хизматлар сифати муҳим омил. Ислоҳотлар натижалари, соҳалардаги ўзгаришлар ҳам аввало маҳаллада сезилади.
Шу боис, Президент Олий Мажлисга Мурожаатномасида барча даражадаги раҳбарлар пастга тушиб, ўз соҳаси бўйича ишни маҳаллаларда ташкил этиши, муаммоларни ўрганиб, уларга ечим топиши зарурлигини таъкидлаган эди. Шу билан бирга, маҳалла идорасининг ваколатини кенгайтириш, раис ва ходимларнинг моддий таъминотини яхшилаш бўйича ташаббуслар илгари сурилган эди.
Давлат раҳбари шундай ишлар билан танишиш мақсадида Юнусобод туманидаги «Янгибоғ» маҳалла фуқаролар йиғинида бўлди.
Қайд этилишича, бу ерда 7 минг нафарга яқин аҳоли истиқомат қилади. 2 мингдан зиёд оила мавжуд. Янги қурилган маҳалла гузари биносида кенг шароитлар яратилган.
Шу ерда Юнусобод туманидаги маҳаллалар фаоллари билан мулоқот бўлди.
«Маҳалла раиси – Президентнинг қуйи бўғиндаги устуни. Маҳалланинг иқтисодиётини ўзгартирсак, жамиятимиз ўзгаради. Бунинг учун ёшларнинг ташаббусларини қўллаб-қувватлаш, ‘Ҳар бир оила – тадбиркор’ дастуридан самарали фойдаланиш керак», – деди Шавкат Мирзиёев.
Кўп қаватли уйларга сифатли хизмат кўрсатувчи бошқарув компаниялари ташкил этиш, ички йўлларни таъмирлаш, маиший хизматларни кўпайтириш бўйича кўрсатмалар берилди.
Аввалроқ Шавкат Мирзиёев Сенатнинг янги биноси қурилишини кўздан кечиргани, Тошкентда очилган янги заргарлик корхонасини бориб кўргани ҳамда Республика ихтисослаштирилган нефрология ва буйрак трансплантацияси илмий-амалий тиббиёт марказига ташриф буюргани ҳақида хабар берилганди.
Изоҳ (0)