Ijtimoiy tarmoqlarda andijonlik bolakayning hokimlarga viloyatning Asaka shahridagi buzilgan ko‘prikni to‘g‘rilab qo‘yishni so‘rab yo‘llagan murojaati tarqaldi. Videodagi suhbatdan ayon bo‘lishicha, voqea Asaka shahrining Amir Temur ko‘chasida joylashgan ko‘prik ustida tasvirga olingan.
Ko‘rinadiki, katta yo‘ldagi ko‘prikning piyodalar qismi ta’mirtalab ahvolga kelib qolgan va panjara bilan to‘sib qo‘yilgan.
Suhbatda tasvir ortidan kimdir ko‘prik ustida o‘tib kelayotgan to‘rt nafar maktab o‘quvchisidan “Yo‘ldagi nosozliklar sizlarni qiynayaptimi?”, deb so‘raydi. Savolga o‘quvchilaridan biri yaqinda shu yerdan o‘tib ketayotgan yo‘lovchilardan birini mashina urib yuborganini aytib bergan.
“Buni qarang, buzib qo‘yganga yarasha to‘g‘rilab qo‘yish kerak-da. Qachongacha bunaqa qilib yuramiz?! Bitta ‘alkash’ mashinada kelib qolsa, bizni urib yubormaydimi? Ko‘pchilik birdan ko‘prikdan o‘tayotganda kimdir sig‘masdan orqaga yursa, mashina yo‘lga chiqib ketsa, nima bo‘ladi? Buzganga yarasha to‘g‘rilab qo‘ysin-da! Bunga qachongacha chidaymiz?!”, – deydi o‘quvchi bolakay.
Tasvir ortidan “Bu masalada kimga murojaat qilasiz?”, degan savolga o‘quvchi bola: “Andijon viloyati hokimiga ham, shahar hokimiga ham”, deb javob bergan.
Videoga “Mana shu boshlang‘ich sinf o‘quvchisi aqli yetgan joyga nahotki ayrim mutasaddilarning aqllari yetmasa?”, degan izoh qoldirilgan. O‘quvchining dadilligi va fikrini erkin bayon etayotganiga esa “Bu bolakaydan kelajakda zo‘r bloger chiqadi”, degan fikr bildirilgan.
Avvalroq o‘zbekistonlik yana bir bolakay vazirlarga “Qani bizning shuncha gaz? Xalqqa ‘svet’, gaz bering!”, deb videomurojaat yo‘llagan edi.
Izoh (0)