Mudofaa vaziri Bahodir Qurbonovga general-leytenant harbiy unvoni berildi. “Kun.uz”ning ma’lum qilishicha, vazirlik matbuot xizmatiga bu ma’lumotni tasdiqladi.
13-yanvar kuni prezident Shavkat Mirziyoyev farmoniga muvofiq, O‘zbekiston Qurolli Kuchlari tashkil etilganining 29 yilligi hamda Vatan himoyachilari kuni munosabati bilan harbiy xizmatchilar va huquqni muhofaza qilish organlari xodimlaridan bir guruhi harbiy unvonlar, orden va medallar bilan taqdirlangan edi. 14-yanvar kuni mukofotlarni topshirish marosimi bo‘lib o‘tdi.
Xabarda aytilishicha, mudofaa vaziri Vatan himoyachilari kuni munosabati bilan Toshkent shahridagi Xalqlar do‘stligi saroyida o‘tkazilgan bayram dasturida ham general-leytenant harbiy unvonli formada mehmonlarga Prezident tabrigini o‘qib eshittirgan.
Ma’lumot uchun, Bahodir Qurbonov 2015—2018-yillarda Toshkent shahar Ichki ishlar bosh boshqarmasi boshlig‘i sifatida ishlagan, 2018-yil fevralida unga general-mayor harbiy unvoni berilib, Toshkent harbiy okrugi qo‘shinlari qo‘mondoni lavozimiga tayinlangan. 2019-yil fevralida esa u O‘zbekiston mudofaa vaziri sifatida ish boshlagandi.
Izoh (0)