Ижтимоий тармоқларда андижонлик болакайнинг ҳокимларга вилоятнинг Асака шаҳридаги бузилган кўприкни тўғрилаб қўйишни сўраб йўллаган мурожаати тарқалди. Видеодаги суҳбатдан аён бўлишича, воқеа Асака шаҳрининг Амир Темур кўчасида жойлашган кўприк устида тасвирга олинган.
Кўринадики, катта йўлдаги кўприкнинг пиёдалар қисми таъмирталаб аҳволга келиб қолган ва панжара билан тўсиб қўйилган.
Суҳбатда тасвир ортидан кимдир кўприк устида ўтиб келаётган тўрт нафар мактаб ўқувчисидан «Йўлдаги носозликлар сизларни қийнаяптими?», деб сўрайди. Саволга ўқувчиларидан бири яқинда шу ердан ўтиб кетаётган йўловчилардан бирини машина уриб юборганини айтиб берган.
«Буни қаранг, бузиб қўйганга яраша тўғрилаб қўйиш керак-да. Қачонгача бунақа қилиб юрамиз?! Битта ‘алкаш’ машинада келиб қолса, бизни уриб юбормайдими? Кўпчилик бирдан кўприкдан ўтаётганда кимдир сиғмасдан орқага юрса, машина йўлга чиқиб кетса, нима бўлади? Бузганга яраша тўғрилаб қўйсин-да! Бунга қачонгача чидаймиз?!», – дейди ўқувчи болакай.
Тасвир ортидан «Бу масалада кимга мурожаат қиласиз?», деган саволга ўқувчи бола: «Андижон вилояти ҳокимига ҳам, шаҳар ҳокимига ҳам», деб жавоб берган.
Видеога «Мана шу бошланғич синф ўқувчиси ақли етган жойга наҳотки айрим мутасаддиларнинг ақллари етмаса?», деган изоҳ қолдирилган. Ўқувчининг дадиллиги ва фикрини эркин баён этаётганига эса «Бу болакайдан келажакда зўр блогер чиқади», деган фикр билдирилган.
Аввалроқ ўзбекистонлик яна бир болакай вазирларга «Қани бизнинг шунча газ? Халққа ‘свет’, газ беринг!», деб видеомурожаат йўллаган эди.
Изоҳ (0)