Jizzax shahrining Mustaqillik ko‘chasi bo‘yida qurilayotgan ko‘p qavatli uylardan birining bir qismi 10-yanvar kuni soat taxminan 17:15 da qulagani haqida xabar berilgan edi. Mustaqillik ko‘chasi bo‘ylab harakatlanib kelayotgan avtomobillardan biriga o‘rnatilgan videoregistratorga binoning qulash jarayoni yozilib qolgan.
Videoyozuv Telegram’dagi kanallarda e’lon qilindi — binoning bir qismi qulagani va shundan so‘ng hammayoq quyuq chang ichida qolganini ko‘rish mumkin. Videoyozuv egasining ta’kidlashicha, haydovchi vaqtida orqaga yurishga ulgurgan, “yo‘qsa mashina titilib ketardi”.
FVV va Bosh prokuratura axborotiga ko‘ra, bino qulashi oqibatida tan jarohati olgan yoki halok bo‘lgan fuqarolar yo‘q. Qayd etishlaricha, binoning qulash sabablarini aniqlash maqsadida Jizzax viloyati prokuraturasi tomonidan tergovga qadar tekshiruv harakatlari olib borilmoqda.
Izoh (0)