Andijon shahriga ichimlik suvi yetkazib beruvchi “Xonobod—Andijon” markaziy suv quvurining Andijon tumani “Xortum” mahallasida joylashgan suv taqsimlash jihozida 9-yanvar kuni nosozlik yuzaga keldi, deyiladi “Andijon suv ta’minoti” kompaniyasining viloyat hokimligi tomonidan e’lon qilingan bayonotida.
Ta’kidlanishicha, ushbu nosozlik oqibatida 11—12-yanvar kunlari aholiga suv yetkazib berishda uzilish yuzaga kelishi mumkin. Shu munosabat bilan, kompaniya Andijon shahri aholisidan uzr so‘ragan holda, ularni ichimlik suvi zaxirasini yaratib olishga chaqirgan.
Kompaniyaning qayd etishicha, Andijon shahriga Jalaquduq tumanida joylashgan “Paxtakor” yerosti suv inshooti orqali ichimlik suvi yetkazib berish choralari ko‘rilmoqda. Shuningdek, 20 ta maxsus suv tashish mashinasi xizmatga shay holatga keltirilgan.
Telegram’dagi “Vodiy bozor” kanalining xabar berishicha, avariya oqibatida Andijon shahri to‘liq, Andijon va Oltinko‘l tumanlarining bir qismi ichimlik suvi ta’minotidan uzilgan.
“Avariyani bartaraf etish uchun katta kuch tashlangan. Voqea joyiga maxsus chodirlar tikildi. Viloyat hokimi va boshqa rahbarlar o‘sha yerda. Ishlayotgan xodimlarga mol so‘yilib, ehson qilinmoqda”, — deyiladi kanal xabarida.
“Andijon bugun” Telegram-kanalida esa shahar aholisi do‘konlarda ko‘plab miqdorda ichimlik suvi sotib olayotgani aks etgan videoyozuv e’lon qilingan.
Mavzuga doir:
- Qashqadaryoda elektr uzilishlari sababli suv ta’minoti to‘xtadi
- “Qarshida kuniga 4-5 soat suv beriladi. Hatto Qoraqalpog‘istonda ham bunday emas!” Shavkat Mirziyoyev Qashqadaryodagi ichimlik suvi muammosi haqida
- Qarshi shahri 7 kundan buyon suvsiz qolmoqda. Do‘konlarda ichimlik suvining litri 1000 so‘mga chiqdi
Izoh (0)