“Vnukovo” aeroportida qolib ketgan 180 nafar o‘zbekistonlik navbatdan tashqari reys bilan vatanga qaytarildi

Rossiyaning “Vnukovo” xalqaro aeroportida Moskva–Samarqand yo‘nalishidagi reys bekor bo‘lishi sababli qolib ketgan o‘zbekistonliklar vatanga qaytarildi, deya xabar bermoqda Tashqi ishlar vazirligi.

Qayd etilishicha, 2021-yilning 7–8-yanvar kunlari Rossiyaning Royal Flight aviakompaniyasiga qarashli Moskva–Samarqand yo‘nalishidagi reys bekor bo‘lishi sababli Moskva shahrining “Vnukovo” xalqaro aeroportida O‘zbekiston fuqarolari to‘plangan.

Xayriya tashkilotlari ko‘magida “Vnukovo” aeroportidagi vatandoshlar issiq ovqat va gigiyena vositalari bilan ta’minlangan.

O‘zbekistonning Moskvadagi elchixonasining tezkor chora-tadbirlari natijasida bekor bo‘lgan reysning barcha yo‘lovchilari (180 kishi) Rossiyaning Azur Air aviakompaniyasining navbatdan tashqari reysi bilan 2021-yil 9-yanvar kuni soat 00:05 da O‘zbekistonga qaytarildi.

Avvalroq o‘zbekistonliklar Rossiyaga kiritilmayotgani haqidagi xabarlarga munosabat bildirilgani hamda Rossiyada qiyin ahvolga tushib qolgan 17 nafar o‘zbekistonlik vatanga olib kelingani haqida xabar berilgandi.