Россиянинг «Внуково» халқаро аэропортида Москва–Самарқанд йўналишидаги рейс бекор бўлиши сабабли қолиб кетган ўзбекистонликлар ватанга қайтарилди, дея хабар бермоқда Ташқи ишлар вазирлиги.
Қайд этилишича, 2021 йилнинг 7–8 январь кунлари Россиянинг Royal Flight авиакомпаниясига қарашли Москва–Самарқанд йўналишидаги рейс бекор бўлиши сабабли Москва шаҳрининг «Внуково» халқаро аэропортида Ўзбекистон фуқаролари тўпланган.
Хайрия ташкилотлари кўмагида «Внуково» аэропортидаги ватандошлар иссиқ овқат ва гигиена воситалари билан таъминланган.
Ўзбекистоннинг Москвадаги элчихонасининг тезкор чора-тадбирлари натижасида бекор бўлган рейснинг барча йўловчилари (180 киши) Россиянинг Azur Air авиакомпаниясининг навбатдан ташқари рейси билан 2021 йил 9 январь куни соат 00:05 да Ўзбекистонга қайтарилди.
Аввалроқ ўзбекистонликлар Россияга киритилмаётгани ҳақидаги хабарларга муносабат билдирилгани ҳамда Россияда қийин аҳволга тушиб қолган 17 нафар ўзбекистонлик ватанга олиб келингани ҳақида хабар берилганди.
Изоҳ (0)