Smart Medical Pharm va Billur Medical Trade 50 millilitrlik 70 foizlik etil spirti hamda “Menovazin” mahsulotlarini noqonuniy ravishda ishlab chiqarayotgani aniqlandi. Bu haqda Farmatsevtika tarmog‘ini rivojlantirish agentligi ma’lum qildi.
Agentlik ma’lumotlariga ko‘ra, ayrim fuqarolar Smart Medical Pharm va Billur Medical Trade kompaniyalariga tegishli dori vositalari sifatidan norozi ekanini bildirgan. Aniqlanishicha, ular dori vositalarini ishlab chiqarish huquqiga ega bo‘lgan litsenziatlar reyestriga kiritilmagan.
Farmatsevtika tarmog‘ini rivojlantirish agentligi dorixonalarni O‘zbekistonda ro‘yxatdan o‘tkazilmagan, sifatsiz, qalbakilashtirilgan dori vositalarini va tibbiy buyumlarni, shuningdek, mamlakatda ro‘yxatdan o‘tkazilgan dori vositalarining g‘ayriqonuniy nusxalarini saqlash va (yoki) realizatsiya qilishga yo‘l qo‘ymasligi, ushbu holatlar litsenziya talablari va shartlarini qo‘pol ravishda buzilishi ekani haqida ogohlantiradi. Aks holat esa litsenziyaning amal qilishi belgilangan tartibda to‘xtatilishiga olib kelishi mumkin.
Ushbu korxonalarning noqonuniy faoliyati yuzasidan Bosh prokuratura huzuridagi Iqtisodiy jinoyatlarga qarshi kurashish departamentiga murojaatnoma yuborilgan.
Avvalroq Intellektual mulk agentligi “Trimol” dori vositasini ishlab chiqaruvchi Hindistonning Ajanta Pharma Ltd kompaniyasining huquqlarini himoya qilgani, “Turmol” tabletkalarini ishlab chiqarayotgan namanganlik tadbirkorlar jarimaga tortilgani to‘g‘risida xabar berilgandi.
Izoh (0)