Boy davlatlar koronavirusga qarshi vaksinalarning aksariyat qismini sotib olgan. Jahon sog‘liqni saqlash tashkiloti u qadar badavlat bo‘lmagan mamlakatlar dori vositasidan foydalana olmasligi mumkinligidan xavotirda. Bu haqda tashkilot rahbari Tedros Gebreyesusga tayanib, “Korrespondent.net” xabar berdi.
Hozirgi kunda koronavirusga qarshi samarali, xavfsiz vaksinalar bilan dunyoning 42 davlatida emlash ishlari olib borilmoqda, ularning 36 tasi — daromadi yuqori bo‘lgan mamlakatlar.
Vaksinalar xaridi bo‘yicha yetakchilar qatoridan Yevropa Ittifoqi davlatlari, Shveysariya, AQSh, Isroil, Buyuk Britaniya o‘rin olgan.
Gebreyesusning fikricha, daromadi past va o‘rtacha bo‘lgan davlatlarning vaksinani qo‘lga kiritish borasidagi muammosini COVAX va ACT-Accelerator yordamida hal etish mumkin. Avvalroq JSSTning vaksinalar bo‘limi boshlig‘i Keyt O’Brayen kambag‘al davlatlar COVAX tashabbusi doirasida dastlabki dozalarning yetkazib berilishiga kamida 2021-yilning yanvar oxirlarida umid qilishi mumkinligini ma’lum qilgandi.
JSST rahbari ortiqcha dori vositalarini sotib olgan mamlakatni COVAX mexanizmi doirasida xayriya qilishga chaqirgan.
“Vaksina millatchiligi barchamizga zarar keltiradi va mag‘lubiyatga eltadi”, — deydi Gebreyesus.
Eslatib o‘tamiz, dekabr oxirlarida koronavirusga qarshi vaksina ishlab chiqish va tarqatish bo‘yicha COVAX xalqaro mexanizmi doirasida qariyb 2 milliard vaksina zaxiraga olingani to‘g‘risida xabar berilgandi.
Izoh (0)