Pokiston poytaxti Islomobod shahrida yuzlab shifokor va talabalar O‘zbekiston va Qirg‘iziston OTMlarida olingan diplomlarni tan olishni talab qilib, ikki kun davomida namoyishlar uyushtirdi. Bu haqda “24.kg” xabar bermoqda.
Xabarda aytilishicha, 7-yanvar kuni ikki mingga yaqin tibbiy o‘quv yurtlarini tugatgan o‘quvchi va talabalar Pokiston tibbiy komissiyasi binosi oldida yig‘ilgan. Bundan bir kun avval politsiya namoyishchilarni dubinka va vodomyotlar bilan tarqatib yuborgan.
Ayrim namoyishchilar politsiyachilarga tosh otganiga qaramay, hodisa vaqtida jiddiy jarohatlanganlar qayd etilmagan. Ayrimlar qo‘lga olinib, keyinroq qo‘yib yuborilgan.
Norozilik kelib chiqishiga Pokiston tibbiy komissiyasining 21 ta qirg‘iz va 6 ta o‘zbek OTMlarining talabga javob bermaydi deb topgani va ushbu o‘quv dargohlarining diplomlarini qabul qilmaslikka qaror qilgani sabab bo‘lgan.
Ma’lum qilinishicha, Qirg‘iziston OTMni bitirgan pokistonliklarning 90 foizi Pokiston tibbiy komissiyasining majburiy imtihondan o‘ta olmaydi, shu sababli ularning diplomlari tan olinmaydi.
Qirg‘iziston Ta’lim vazirligi rahbariyatining fikricha, yuzaga kelgan holat Qirg‘iziston fuqarolari uchun ham, chet el fuqarolari uchun ham kadrlar tayyorlash sifati pastligi bilan bog‘liq. Vazirlik rahbariyati universitetlar umumiy ko‘rsatkichlarini yaxshilash uchun pokistonlik talabalarga kirish talablarini kuchaytirishga chaqirgan.
Izoh (0)