Бой давлатлар коронавирусга қарши вакциналарнинг аксарият қисмини сотиб олган. Жаҳон соғлиқни сақлаш ташкилоти у қадар бадавлат бўлмаган мамлакатлар дори воситасидан фойдалана олмаслиги мумкинлигидан хавотирда. Бу ҳақда ташкилот раҳбари Тедрос Гебрейесусга таяниб, «Korrespondent.net» хабар берди.
Ҳозирги кунда коронавирусга қарши самарали, хавфсиз вакциналар билан дунёнинг 42 давлатида эмлаш ишлари олиб борилмоқда, уларнинг 36 таси — даромади юқори бўлган мамлакатлар.
Вакциналар хариди бўйича етакчилар қаторидан Европа Иттифоқи давлатлари, Швейцария, АҚШ, Исроил, Буюк Британия ўрин олган.
Гебрейесуснинг фикрича, даромади паст ва ўртача бўлган давлатларнинг вакцинани қўлга киритиш борасидаги муаммосини COVAX ва ACT-Accelerator ёрдамида ҳал этиш мумкин. Аввалроқ ЖССТнинг вакциналар бўлими бошлиғи Кейт O’Брайен камбағал давлатлар COVAX ташаббуси доирасида дастлабки дозаларнинг етказиб берилишига камида 2021 йилнинг январь охирларида умид қилиши мумкинлигини маълум қилганди.
ЖССТ раҳбари ортиқча дори воситаларини сотиб олган мамлакатни COVAX механизми доирасида хайрия қилишга чақирган.
«Вакцина миллатчилиги барчамизга зарар келтиради ва мағлубиятга элтади», — дейди Гебрейесус.
Эслатиб ўтамиз, декабрь охирларида коронавирусга қарши вакцина ишлаб чиқиш ва тарқатиш бўйича COVAX халқаро механизми доирасида қарийб 2 миллиард вакцина захирага олингани тўғрисида хабар берилганди.
Изоҳ (0)